Furmaziun
28. September 2023
Exposiziun ambulanta «Helvetissems – spezialitads linguisticas» uss era per interpresas svizras!
Dapi il 2019 è l‚exposiziun ambulanta «Helvetissems – spezialitads linguisticas», realisada dal Centre Dürrenmatt a Neuchâtel en collavuraziun cun il Forum Helveticum e cun contribuziuns da differentas instituziuns, da viadi en Svizra.
Per iniziativa dal Forum da la bilinguitad e dal Forum Helveticum e grazia al sustegn finanzial da La Posta Svizra e da la Fundaziun da giubileum da Raiffeisen èsi stà pussaivel da producir ina segunda exposiziun pli cumpacta. Quella vegn ussa preschentada ad interpresas svizras che sa stentan da tematisar dumondas da la chapientscha e da la convivenza en Svizra e che vulan sensibilisar lur collavuraturas e collavuraturs sco era lur clientella per il tema plurilinguitad – er en il mintgadi d’ina interpresa.
22. Mai 2022
Science fiction e plurilinguitad en il focus dal final da LINGUISSIMO
22 giuvnas e giuvens cun in dun da scriver da l’entira Svizra èn s’inscuntrads dals 21 fin ils 22 da matg 2022 ad Yverdon-les-Bains (VD) al final da l’occurrenza da linguas naziunala Linguissimo. Lur pensum: scriver in’istorgia da science fiction u da fantasia sur ils cunfins linguistics ora. Ina giuria d’auturas e d’auturs da la Svizra ha elegì las meglras ovras: sis victuras e victurs dals chantuns AG, GR, VD, VS, SZ e ZH gudognan in viadi cuminaivel en ina citad europeica. Linguissimo vegn organisà dapi il 2008 dal Forum Helveticum. Dapli
17. Mai 2022
Giuvenils sin ils fastizs da science fiction e da la plurilinguitad
25 giuvnas e giuvens cun in dun da scriver da l’entira Svizra s’inscuntran ad Yverdon-les-Bains (VD) a chaschun dal 14avel final da l’occurrenza da scriver naziunala Linguissimo. Trais dals giuvenils èn da chasa en il chantun Grischun. L’occurrenza organisada dal Forum Helveticum ha lieu dals 21 – 22 da matg 2022 en il museum Maison d’Ailleurs ed è deditgada als geners litterars science fiction e fantasia. L’inscunter stat era sut l’ensaina da la plurilinguitad. Da gudagnar datti in viadi en ina citad europeica u ad in’occurrenza culturala en Svizra. Dapli
12. Januar 2022
LINGUISSIMO ramassa ramurs da tut las regiuns da la Svizra
Il sgarar dals patins sin in lai schelà en il Grischun, il schuschurar da la feglia en ils guauds da chastagners tessinais, il sgriztgar dal mecanissem da l’ura da la tur Zytglogge a Berna, il sgargugliar da l’aua en ils chanals da sauaziun en il Vallais … La Svizra è plain ramurs! Giuvnas scripturas e giuvens scripturs da tut la Svizra pon sa laschar inspirar da lur lieus preferids ed inoltrar lur texts davart quest chavazzin a la concurrenza svizra da las linguas Linguissimo.
2. September 2021
In final criminal a la concurrenza svizra da las linguas LINGUISSIMO a Soloturn
29 giuvnas scripturas talentadas e giuvens scripturs talentads da tut las Svizra èn s’inscuntrads ils 28 ed ils 29 d’avust 2021 a Soloturn al final da la concurrenza svizra da linguas Linguissimo. Lur incumbensa: scriver in’istorgia criminala, e quai sur ils cunfins linguistics. Ina giuria d’auturas e d’auturs svizzers ha tschernì las meglras ovras: las set victuras e victurs ventiraivels dals chantuns AG, FR, GE, GR e VD gudognan in viadi communabel en ina citad europeica ubain ad in’occurrenza culturala en Svizra. Il Forum Helveticum organisescha Linguissimo dapi il 2008. Dapli
23. August 2021
Giuvnas scripturas talentadas e giuvens scripturs talentads sin ils fastizs dal crimi e da la plurilinguitad a Soloturn
30 giuvenils da tut la Svizra s’inscuntran a Soloturn a chaschun dal tredeschavel final da la concurrenza svizra da las linguas Linguissimo. En il center stat il crimi e l’inscunter pluriling. L’occurrenza organisada dal Forum Helveticum ha lieu ils 28 ed ils 29 d’avust 2021 en la Biblioteca centrala da Soloturn ed en il chastè da Waldegg. Da gudagnar datti in viadi en ina citad europeica ubain ad in’occurrenza culturala en Svizra. Dapli