Linguissimo è ina concurrenza da scriver plurilingua per giuvnas e giuvens svizzers en la vegliadetgna da 16 fin 21 onns.
Linguissimo
11. Oktober 2023
La nova ediziun 2023/2024 da LINGUISSIMO è lantschada!
La pli nova ediziun da la concurrenza da scriver Linguissimo è lantschada! Gia per la 16avla giada envidain nus giuvenils tranter 16 e 21 onns da participar a la concurrenza plurilingua. Il motto da quest onn sa cloma «Pertge betg?».
16. Mai 2023
Paraulas e plurilinguitad en il focus dal final da Linguissimo
21 giuvnas e giuvens cun in dun da scriver da l’entira Svizra èn s’inscuntrads dals 13 fin ils 14 da matg 2023 a Cuira al final da l’occurrenza da scriver naziunala Linguissimo. Lur pensum: scriver ina paraula sur ils cunfins linguistics ora. Ina giuria da raquintadras e raquintaders da la Svizra ha elegì las meglras ovras: sis victuras e victurs dals chantuns BE, FR, GE, SZ e VD gudognan in viadi cuminaivel en Svizra. Linguissimo vegn organisà dapi il 2008 dal Forum Helveticum.
8. Dezember 2022
La nova ediziun 2022/2023 da LINGUISSIMO è lantschada!
La pli nova ediziun da la concurrenza da las linguas Linguissimo è lantschada! Gia per la 15avla giada envidain nus giuvenils tranter 16 e 21 onns da participar a la concurrenza plurilingua. Il motto da quest onn sa cloma «da tuttas colurs».
22. Mai 2022
Science fiction e plurilinguitad en il focus dal final da LINGUISSIMO
22 giuvnas e giuvens cun in dun da scriver da l’entira Svizra èn s’inscuntrads dals 21 fin ils 22 da matg 2022 ad Yverdon-les-Bains (VD) al final da l’occurrenza da linguas naziunala Linguissimo. Lur pensum: scriver in’istorgia da science fiction u da fantasia sur ils cunfins linguistics ora. Ina giuria d’auturas e d’auturs da la Svizra ha elegì las meglras ovras: sis victuras e victurs dals chantuns AG, GR, VD, VS, SZ e ZH gudognan in viadi cuminaivel en ina citad europeica. Linguissimo vegn organisà dapi il 2008 dal Forum Helveticum. Dapli
17. Mai 2022
Giuvenils sin ils fastizs da science fiction e da la plurilinguitad
25 giuvnas e giuvens cun in dun da scriver da l’entira Svizra s’inscuntran ad Yverdon-les-Bains (VD) a chaschun dal 14avel final da l’occurrenza da scriver naziunala Linguissimo. Trais dals giuvenils èn da chasa en il chantun Grischun. L’occurrenza organisada dal Forum Helveticum ha lieu dals 21 – 22 da matg 2022 en il museum Maison d’Ailleurs ed è deditgada als geners litterars science fiction e fantasia. L’inscunter stat era sut l’ensaina da la plurilinguitad. Da gudagnar datti in viadi en ina citad europeica u ad in’occurrenza culturala en Svizra. Dapli
12. Januar 2022
LINGUISSIMO ramassa ramurs da tut las regiuns da la Svizra
Il sgarar dals patins sin in lai schelà en il Grischun, il schuschurar da la feglia en ils guauds da chastagners tessinais, il sgriztgar dal mecanissem da l’ura da la tur Zytglogge a Berna, il sgargugliar da l’aua en ils chanals da sauaziun en il Vallais … La Svizra è plain ramurs! Giuvnas scripturas e giuvens scripturs da tut la Svizra pon sa laschar inspirar da lur lieus preferids ed inoltrar lur texts davart quest chavazzin a la concurrenza svizra da las linguas Linguissimo.