22. Mai 2022
Science fiction e plurilinguitad en il focus dal final da LINGUISSIMO
22 giuvnas e giuvens cun in dun da scriver da l’entira Svizra èn s’inscuntrads dals 21 fin ils 22 da matg 2022 ad Yverdon-les-Bains (VD) al final da l’occurrenza da linguas naziunala Linguissimo. Lur pensum: scriver in’istorgia da science fiction u da fantasia sur ils cunfins linguistics ora. Ina giuria d’auturas e d’auturs da la Svizra ha elegì las meglras ovras: sis victuras e victurs dals chantuns AG, GR, VD, VS, SZ e ZH gudognan in viadi cuminaivel en ina citad europeica. Linguissimo vegn organisà dapi il 2008 dal Forum Helveticum.
Da las passa 250 inoltraziuns da participantas e participants tranter 16 e 21 onns han ins tschernì 22 finalistas e finalists per la segunda runda. A chaschun dal final dals 21 fin ils 22 da matg 2022 en il museum da science fiction singular Maison d’Ailleurs han talents da scriver giuvens inscuntrà ad Yverdon-les-Bains (VD) auturas ed auturs da la Svizra: Nina Egli (ZH) – enconuschenta sut il pseudonim Carmen Capiti –, Asa S. Hendry (GR), Stéphane Bovon (VD) ed Andrea Fazioli (TI). Ellas ed els han introducì ils giuvenils en ils munds aventurus da science fiction e fantasia.
La dumengia han ils giuvenils preschentà lur texts curts scrits en tandems bilings e la giuria ha proclamà l’elecziun dals megliers texts: las victuras ed ils victurs da l’ediziun 2022 èn da chasa en ils chantuns AG, GR, VD, VS, SZ e ZH e represchentan ina giuventetgna svizra inspirada da la ritgezza culturala e linguistica da lur pajais. Ellas ed els gudognan in viadi cuminaivel en ina citad europeica.
Il premi da classa da CHF 500.–, per il qual ins ha tratg la sort tranter tut las classas participantas, va a la classa da Francesca Suppa dal Gymnase de Burier a La Tour-de-Peilz (VD).
La proxima ediziun da la concurrenza svizra da las linguas Linguissimo cumenza l’atun 2022. Tut las classas da scola dal stgalim secundar II e tut ils giuvenils da 16 fin 21 onns da la Svizra èn cordialmain envidads da sa participar. Tut las infurmaziuns èn disponiblas sin www.linguissimo.ch.
Infurmaziuns a las medias:
Quinta Schneiter, mainafatschenta a.i. Forum Helveticum, info@linguissimo.ch ubain t 062 888 01 25
Colliaziun per las medias: http://linguissimo.ch/ch/medias-2/
Communicaziun a las medias (PDF)
Commentaris