23. August 2021
Giuvnas scripturas talentadas e giuvens scripturs talentads sin ils fastizs dal crimi e da la plurilinguitad a Soloturn
30 giuvenils da tut la Svizra s’inscuntran a Soloturn a chaschun dal tredeschavel final da la concurrenza svizra da las linguas Linguissimo. En il center stat il crimi e l’inscunter pluriling. L’occurrenza organisada dal Forum Helveticum ha lieu ils 28 ed ils 29 d’avust 2021 en la Biblioteca centrala da Soloturn ed en il chastè da Waldegg. Da gudagnar datti in viadi en ina citad europeica ubain ad in’occurrenza culturala en Svizra.
L’emprima runda da la concurrenza da scriver ha registrà in record d’annunzias: da passa 280 texts inoltrads da giuvenils tranter 16 e 21 onns da tut la Svizra ha la giuria tschernì 30 finalistas e finalists da las quatter regiuns linguisticas. Els tuts han inoltrà texts e maletgs davart lieus ch’èn impurtants per els e che tematiseschan il chavazzin «Portas». Quels èn publitgads sin la charta svizra interactiva da Linguissimo. En quest guid turistic virtual singular che surpassa ils cunfins linguistics pon ins gia scuvrir 950 contribuziuns creativas!
Durant la fin d’emna en la Biblioteca centrala da Soloturn ed en il chastè da Waldegg han las giuvnas scripturas talentadas ed ils giuvens scripturs talentads l’incumbensa da scriver en tandems ina curta istorgia criminala bilingua. Els vegnan introducids en il mund dal crimi da l’autur Christof Gasser (SO) – enconuschent per ses crimis da Soloturn – sco era da las auturas Olivia Gerig (GE) e Romana Ganzoni (GR) e da l’autur Andrea Fazioli (TI). Per accents musicals la sonda saira procuran la giuvna musicista da jazz da Soloturn Salome Moana ed il ghitarrist Silvan Joray. La dumengia vegnan tschernids ils trais tandems victurs dal final. Els gudognan in viadi communabel en ina citad europeica ubain ad in’occurrenza culturala en Svizra.
Las collavuraturas ed ils collavuraturs da medias èn envidads cordialmain a la prelecziun live da las istorgias curtas da las finalistas e dals finalists da Linguissimo la dumengia, ils 29 d’avust 2021 a las 13.30 en la sala da teater dal chastè da Waldegg (Waldeggstrasse 1, 4532 Feldbrunnen-St. Niklaus). En consequenza da Covid-19 è il dumber da plazzas limità; nus As supplitgain d’As annunziar ordavant via info@linguissimo.ch fin il pli tard ils 25 d’avust 2021.
La concurrenza Linguissimo vegn organisada dapi il 2008 dal Forum Helveticum, l’organisaziun per la chapientscha linguistica e culturala en Svizra, e da ses partenaris. Dapli infurmaziuns davart il project chattais Vus sin www.linguissimo.ch.
Communicaziun a las medias (PDF)
Infurmaziuns a las medias:
Quinta Schneiter, manadra da project Linguissimo, info@linguissimo.ch ubain t 062 888 01 25
Link per las medias: http://linguissimo.ch/ch/medias-2/
Cun sustegn da:
Commentaris