17. Mai 2022
Giuvenils sin ils fastizs da science fiction e da la plurilinguitad
25 giuvnas e giuvens cun in dun da scriver da l’entira Svizra s’inscuntran ad Yverdon-les-Bains (VD) a chaschun dal 14avel final da l’occurrenza da scriver naziunala Linguissimo. Trais dals giuvenils èn da chasa en il chantun Grischun. L’occurrenza organisada dal Forum Helveticum ha lieu dals 21 – 22 da matg 2022 en il museum Maison d’Ailleurs ed è deditgada als geners litterars science fiction e fantasia. L’inscunter stat era sut l’ensaina da la plurilinguitad. Da gudagnar datti in viadi en ina citad europeica u ad in’occurrenza culturala en Svizra.
Per l’emprima runda da la concurrenza da linguas han passa 250 giuvenils tranter 16 e 21 onns or da las quatter regiuns linguisticas inoltrà texts davart lieus ch’èn impurtants per ellas ed els e che tematiseschan il chavazzin «ramurs». Quels èn publitgads sin la charta svizra interactiva da Linguissimo. En quest guid turistic virtual singular che surpassa ils cunfins linguistics pon ins scuvrir gia passa 1’200 contribuziuns creativas!
Ina giuria ha tschernì 25 giuvenils per il final naziunal che ha lieu en la Maison d’Ailleurs, in museum per science fiction, utopias e viadis fantastics ad Yverdon-les-Bains (VD). Durant la fin d’emna dal final han ils talents giuvens l’incumbensa da scriver en tandems bilings in’istorgia curta da science fiction u da fantasia. L’introducziun en il mund da las visiuns dal futur e dals animals fabulus fan quatter auturas ed auturs da la Svizra: Nina Egli (ZH) – enconuschenta sut il pseudonim Carmen Capiti –, Asa S. Hendry (GR), Stéphane Bovon (VD) ed Andrea Fazioli (TI). La dumengia vegnan elegids ils trais tandems victurs. Sco premi survegnan els in viadi cuminaivel en ina citad europeica u ad in’occurrenza culturala en Svizra.
Linguissimo vegn realisà dapi il 2008 dal Forum Helveticum, l’organisaziun per la chapientscha linguistica e culturala en Svizra, e da ses partenaris. Dapli infurmaziuns davart il project chattais Vus sin www.linguissimo.ch.
Infurmaziuns a las medias:
Quinta Schneiter, mainafatschenta a.i. Forum Helveticum, info@linguissimo.ch ubain t 062 888 01 25
Colliaziun per las medias: http://linguissimo.ch/ch/medias-2/
Communicaziun a las medias (PDF)
Commentaris