2. September 2021
In final criminal a la concurrenza svizra da las linguas LINGUISSIMO a Soloturn
29 giuvnas scripturas talentadas e giuvens scripturs talentads da tut las Svizra èn s’inscuntrads ils 28 ed ils 29 d’avust 2021 a Soloturn al final da la concurrenza svizra da linguas Linguissimo. Lur incumbensa: scriver in’istorgia criminala, e quai sur ils cunfins linguistics. Ina giuria d’auturas e d’auturs svizzers ha tschernì las meglras ovras: las set victuras e victurs ventiraivels dals chantuns AG, FR, GE, GR e VD gudognan in viadi communabel en ina citad europeica ubain ad in’occurrenza culturala en Svizra. Il Forum Helveticum organisescha Linguissimo dapi il 2008.
Da passa 280 texts inoltrads da giuvenils tranter 16 e 21 onns èn vegnids tschernids 29 finalistas e finalists da las quatter regiuns linguisticas per la segunda runda. A chaschun dal final ils 28 e 29 d’avust 2021 en la Biblioteca centrala da Soloturn ed en il chastè da Waldegg han las giuvnas scripturas talentadas ed ils giuvens scripturs talentads inscuntrà auturas ed auturs svizzers: Christof Gasser (SO) – enconuschent per ses crimis da Soloturn – sco era Olivia Gerig (GE), Andrea Fazioli (TI) e Romana Ganzoni (GR). Els han introducì ils giuvenils en la tematica dal scriver istorgias criminalas. In ulteriur punct culminant da la fin d’emna è stà il concert da la giuvna musicista da jazz da Soloturn Salome Moana, accumpagnada dal ghitarrist Silvan Joray.
La dumengia han las finalistas ed ils finalists preschentà en la sala pumpusa dal chastè da Waldegg lur istorgias criminalas cumpiladas en tandems plurilings. Igl è stà in mument fitg excitant, cura che la giuria ha annunzià la tscherna dals megliers texts: las set victuras e victurs da l’ediziun 2021 derivan dals chantuns AG, FR, GE, GR e VD e represchentan ina giuventetgna svizra inspirada da la ritgezza linguistic-culturala da ses pajais. Els gudognan in viadi communabel en ina citad europeica ubain ad in’occurrenza culturala en Svizra.
Il premi da classa da CHF 500.–, per il qual ins ha tratg la sort tranter tut las classas participantas, va a la classa da signur Erwin Mägert da la scola Didac a Losanna.
La proxima ediziun da la concurrenza svizra da las linguas Linguissimo cumenza il settember 2021. Tut las classas da scola dal stgalim secundar II e tut ils giuvenils da 16 fin 21 onns da la Svizra èn cordialmain envidads da sa participar. Tut las infurmaziuns èn disponiblas sin la pagina-web www.linguissimo.ch.
Communicaziun a las medias (PDF)
Infurmaziuns a las medias:
Quinta Schneiter, manadra da project Linguissimo, info@linguissimo.ch ubain t 062 888 01 25
Link per las medias: http://linguissimo.ch/ch/medias-2/
Cun sustegn da:
Commentaris