12. Januar 2022
LINGUISSIMO ramassa ramurs da tut las regiuns da la Svizra
Il sgarar dals patins sin in lai schelà en il Grischun, il schuschurar da la feglia en ils guauds da chastagners tessinais, il sgriztgar dal mecanissem da l’ura da la tur Zytglogge a Berna, il sgargugliar da l’aua en ils chanals da sauaziun en il Vallais … La Svizra è plain ramurs! Giuvnas scripturas e giuvens scripturs da tut la Svizra pon sa laschar inspirar da lur lieus preferids ed inoltrar lur texts davart quest chavazzin a la concurrenza svizra da las linguas Linguissimo.
Per participar a la pli nova ediziun da Linguissimo pon giuvenils da 16 fin 21 onns e classas dal stgalim secundar II chargiar lur texts davart il tema «ramurs» en ina charta interactiva da la Svizra sin www.linguissimo.ch ed inoltrar in segund text che tracta in’anecdota davart in’experientscha en pliras linguas. Quest text scrivan els en in’autra lingua naziunala che quella da l’emprim text. Cun inoltrar in text sa participeschan las giuvnas ed ils giuvens a la creaziun d’in guid da viadi virtual singular sur ils cunfins linguistics che cumpiglia gia passa 940 endataziuns.
Ina giuria tscherna las 30 meglras contribuziuns ed envida las auturas ed ils auturs da quellas a la fin d’emna da final che ha lieu il matg 2022. L’occurrenza en la Maison D’Ailleurs ad Yverdon-les-Bain (VD) è deditgada al gener litterar da science fiction e fantasy. Là pon las giuvnas auturas talentadas ed ils giuvens auturs talentads collavurar cun auturas ed auturs da la Svizra e scriver en in tandem in’istorgia curta bilingua. La fin d’emna metta en il center l’inscunter da giuvnas e giuvens cun giuvenils d’autras regiuns linguisticas ed als duai mussar: Ins na sto betg savair perfetgamain ina lingua per pudair communitgar in cun l’auter e crear in’ovra communabla. Ils trais megliers teams gudognan in viadi communabel en ina metropola europeica ubain ad in’occurrenza culturala en Svizra. Ultra da quai pon ins gudagnar 500 francs per la cassa da classa.
Il termin d’annunzia per la 14avla ediziun da la concurrenza svizra da las linguas Linguissimo scada prest: giuvenils e classas pon anc s’inscriver fin ils 31 da schaner 2022. Las contribuziuns pon els inoltrar fin ils 15 da favrer 2022.
Linguissimo vegn organisà dapi il 2008 dal Forum Helveticum, l’organisaziun per la chapientscha linguistica e culturala en Svizra, e da ses partenaris. Las infurmaziuns davart la participaziun ed indicaziuns didacticas per las persunas d’instrucziun datti en tut las quatter linguas naziunalas sin la pagina-web www.linguissimo.ch.
Contact per las medias:
Quinta Schneiter, manadra da project, Forum Helveticum, info@linguissimo.ch ubain t 062 888 01 25
Colliaziun per las medias: http://linguissimo.ch/ch/medias-2/
Communicaziun a las medias (PDF)
Cun sustegn da:
Partenari local:
Commentaris