16. Mai 2023
Paraulas e plurilinguitad en il focus dal final da Linguissimo
21 giuvnas e giuvens cun in dun da scriver da l’entira Svizra èn s’inscuntrads dals 13 fin ils 14 da matg 2023 a Cuira al final da l’occurrenza da scriver naziunala Linguissimo. Lur pensum: scriver ina paraula sur ils cunfins linguistics ora. Ina giuria da raquintadras e raquintaders da la Svizra ha elegì las meglras ovras: sis victuras e victurs dals chantuns BE, FR, GE, SZ e VD gudognan in viadi cuminaivel en Svizra. Linguissimo vegn organisà dapi il 2008 dal Forum Helveticum.
Da las passa 300 inoltraziuns da participantas e participants tranter 16 e 21 onns han ins tschernì 21 finalistas e finalists per la segunda runda. A chaschun dal final dals 13 fin ils 14 da matg 2023 a la sedia principala da la Lia Rumantscha a Cuira han talents da scriver giuvens inscuntrà raquintadras e raquintaders da la Svizra: Conchi Vega (tudestg), Lorette Andersen (franzos), Cristina Galfetti Schneider (talian) e Lorenzo Polin (rumantsch). Els han manà ils giuvenils en il mund multifar da las paraulas e ditgas.
La dumengia han ils giuvenils preschentà lur texts curts scrits en tandems bilings e la giuria ha proclamà l’elecziun dals megliers texts: las victuras ed ils victurs da l’ediziun 2023 èn da chasa en ils chantuns BE, FR, GE, SZ e VD e represchentan ina giuventetgna svizra inspirada da la ritgezza culturala e linguistica da lur pajais. Ellas ed els gudognan in viadi cuminaivel en Svizra.
Durant il final han ils giuvenils en pli gì la chaschun da prender part d’ina saira da paraulas quadrilingua e d’in curs d’introducziun en la lingua rumantscha.
Commentaris