27. September 2020
Giuvens scripturs talentads insceneschan la plurilinguitad a Bellinzona
24 giuvenils da tut la Svizra èn sa radunads dals 26 fin ils 27 da settember 2020 en la Biblioteca chantunala da Bellinzona per scriver scenas da teater senza sa laschar restrenscher dals cunfins linguistics. La concurrenza svizra da las linguas Linguissimo vegn organisada dapi il 2008 dal Forum Helveticum. Il final da la dudeschavla ediziun han gudagnà giuvenils dals chantuns da Friburg, Berna, Grischun e Vad. Quai èn las auturas ed ils auturs dals trais megliers texts ch’èn vegnids scrits en tandems plurilings.
Da passa 230 texts inoltrads da giuvnas participantas e giuvens participants da 16 fin 21 onns da tut la Svizra èn vegnids tschernids las finalistas ed ils finalists da las quatter regiuns linguisticas. A chaschun dal final dals 26 fin ils 27 da settember 2020 en la Biblioteca chantunala da Bellinzona èn s’inscuntrads ils giuvens scripturs talentads cun auturas ed auturs svizzers: Flavio Stroppini (TI), Christine Schmocker (BE), Michaël Perruchoud (FR) ed Annina Sedláček (GR). Els han introducì ils giuvenils en la tematica dal scriver tocs da teater. In ulteriur punct culminant da la fin d’emna è stà il concert dal musicist tessinais Marco Zappa.
Manuele Bertoli, cusseglier guvernativ e directur per furmaziun, cultura e sport, ha beneventà ils giuvenils dumengia suentermezdi e ludà il barat sur ils cunfins linguistics. Silsuenter han las finalistas ed ils finalists preschentà a la giuria lur scenas da teater cumpiladas en tandems plurilings. Las sis victuras e victurs da l’ediziun 2020 derivan dals chantuns da Friburg, Berna, Grischun e Vad e represchentan ina giuventetgna svizra averta ed inspirada da las differentas culturas da ses pajais. Ils giuvenils gudognan in viadi communabel en ina citad europeica ubain ad in’occurrenza culturala en Svizra.
Il premi da classa da CHF 500.–, per il qual ins ha tratg la sort tranter tut las classas participantas, va a la classa S2b da signur Jacques Heller da la scola professiunala commerziala kvBL a Liestal.
La proxima ediziun da la concurrenza svizra da las linguas Linguissimo cumenza gia l’october 2020. Il chavazzin per l’emprima runda sa cloma «La porta». Tut las classas da scola dal stgalim secundar II e tut ils giuvenils da la Svizra da 16 fin 21 onns èn cordialmain envidads da sa participar. Tut las infurmaziuns èn disponiblas sin la pagina-web www.linguissimo.ch.
Commentaris