8. Dezember 2022
La nova ediziun 2022/2023 da LINGUISSIMO è lantschada!
La pli nova ediziun da la concurrenza da las linguas Linguissimo è lantschada! Gia per la 15avla giada envidain nus giuvenils tranter 16 e 21 onns da participar a la concurrenza plurilingua. Il motto da quest onn sa cloma «da tuttas colurs».
La concurrenza Linguissimo sa drizza a giuvenils tranter 16 e 21 onns ed a classas dal stgalim secundar II da tut la Svizra.
L’emprima runda: Ils giuvenils scrivan dus texts, mintgin en in’autra lingua naziunala. L’emprim text tracta il chavazzin «da tuttas colurs» en colliaziun cun in lieu ch’è impurtant per l’autura/l’autur dal text u ch’als inspirescha. Lubì è tut: ficziun, descripziun, poesia, … Il text po vegnir cumplettà cun in’atgna illustraziun (dissegn, foto, video, etc.). Il segund text pli curt tracta d’ina experientscha persunala cun la plurilinguitad. Las duas contribuziuns vegnan integradas en ina charta naziunala interactiva da la pagina-web www.linguissimo.ch. Quest guid virtual unic cumpiglia gia passa 1200 contribuziuns ch’envidan da scuvrir ina Svizra purtretada da giuvenils.
La runda finala: Las auturas ed ils auturs da las 30 contribuziuns las pli creativas pon participar al final deditgà al tema paraulas e ditgas. Il final che ha lieu a Cuira metta en il center l’inscunter ed il barat linguistic: Las participantas ed ils participants scrivan – ensemen cun in giuvenil d’ina autra regiun linguistica e cun agid d’expertas e d’experts da paraulas e ditgas da tut las quatter regiuns linguisticas – ina curta istorgia ch’els preschentan silsuenter a la giuria. Ils trais megliers tandems gudognan in viadi cuminaivel u ina participaziun cuminaivla ad in’occurrenza culturala.
Ultim termin d’annunzia: 31 da schaner 2023
Ultim termin per inoltrar contribuziuns: 15 da favrer 2023
Commentaris