---

Chanzlia federala

La Chanzlia federala è il post da stab dal Cussegl federal.

La Chanzlia federala furnescha prestaziuns da servetsch per il Cussegl federal e per l'administraziun federala sco er per la populaziun. Sia purschida da servetschs s'adatta cuntinuadamain a las novas sfidas ed als novs basegns.

La Chanzlia federala è il post da stab dal Cussegl federal ed funcziuna sco scharnier tranter la regenza, l’administraziun, il parlament e la populaziun. Ella sustegna il Cussegl federal e la presidenta da la Confederaziun en lur activitads guvernativas, en collavuraziun cun ils departaments, ella prepara ils documents che permettan ina politica coerenta a lunga vista ed ella procura er che las infurmaziuns davart las decisiuns dal Cussegl federal vegnian communitgadas il pli spert pussaivel.

La Chanzlia federala infurmescha
Las burgaisas ed ils burgais han il dretg da vegnir infurmads prontamain e detagliadamain. La communicaziun da la Confederaziun sco er l'observaziun da la plurilinguitad da l'administraziun federala envers la publicitad vegn coordinada da la Chanzlia federala. Il pledader dal Cussegl federal e vicechancelier André Simonazzi infurmescha las medias e la publicitad suenter la sesida dal cussegl federal che ha lieu ina giada l'emna.

Ultra da quai ademplescha la Chanzlia federala incumbensas executivas che la legislaziun l’attribuescha, en spezial procura ella che las votantas ed ils votants possian far diever da lur dretgs politics tenor la Constituziun e tenor la Lescha davart ils dretgs politics. Ella surveglia che tut las votaziuns ed elecziuns federalas vegnian realisadas correctamain. Ella publitgescha cun la gronda premura pretendida e cun la qualitad necessaria ils texts giuridics ed auters documents uffizials. Ella furnescha prestaziun da translaziun, da terminologia e da coordinaziun tenor l’Ordinaziun dals 14 da november 2012 davart ils servetschs linguistics da l'administraziun federala ed ella realisescha las incumbensas affidadas da la Lescha da linguas.

La Chanzlia federala garantescha ils dretgs politics
Elecziuns, votaziuns, referendums, iniziativas, petiziuns... En strusch in auter stadi suveran n'ha il pievel dretgs da cundecisiun uschè vasts sco en Svizra. Ultra da quai coordinescha la Chanzlia federala l'introducziun dal «Vote électronique».

En la domena da las linguas s’engascha la Chanzlia federala per il plurilinguissem en l’administraziun federala e per l’egualitad da las linguas uffizialas. Ella garantescha er la qualitad da la legislaziun da la Confederaziun. En particular formulescha ella ils princips per la redacziun furmala dals texts normativs ed ella procura ch’els vegnian er resguardads. En collavuraziun cun l’Uffizi federal da giustia garantescha ella che tut las versiuns en las linguas uffizialas sa correspundian en il cuntegn ed en la furma, che la lingua ed il cuntegn sajan adattadas per ils destinataris e ch’ils texts giuridics sajan coerents ed enclegentaivels per la populaziun.

Publicaziuns da la Chanzlia federala
La Chanzlia federala è responsabla per la collecziun uffiziala dal dretg federal, per il Fegl uffizial federal sco er per la Collecziun sistematica dal dretg federal. Broschuras sco "La Confederaziun en furma concisa" infurmeschan la publicitad davart il stadi svizzer e davart sias funcziuns.

La Chanzlia federala en l'internet
La Chanzlia federala tgira diversas preschentaziuns da la Confederaziun en l'internet:
www.admin.ch,
www.bundesrat.admin.ch,
www.bk.admin.ch,
www.news.admin.ch
ed il portal svizzer
www.ch.ch.  Ella promova il e-government e coordinescha las activitads en l’internet da tut ils departaments.

---