26. September 2024
La nova ediziun 2024/2025 da LINGUISSIMO è lantschada!
La pli nova ediziun da la concurrenza da scriver Linguissimo è lantschada! Gia per la 17avla giada envidain nus giuvenils tranter 16 e 21 onns da participar a la concurrenza plurilingua. Il motto da quest onn sa cloma «Viadi en il temp».
La concurrenza Linguissimo sa drizza a giuvenils tranter 16 e 21 onns ed a classas dal stgalim secundar II da tut la Svizra.
Per pudair participar a la concurrenza scrivan ils giuvenils dus texts, mintgin en in’autra lingua naziunala. En l’emprim text vai per il tema «Viadi en il temp». Sche las scolaras ed ils scolars vulan, pon els sa referir ad in lieu spezial en Svizra. Alura vegn lur text eventualmain publitgà sin la charta interactiva da la concurrenza. Lubì è tut: ficziun, descripziun, poesia … Il segund text pli curt tracta d’ina experientscha persunala cun linguas estras u cun la plurilinguitad.
Las auturas ed ils auturs da las 30 contribuziuns las pli creativas pon participar al final che ha lieu questa giada a Delémont. Il final metta en il center l’inscunter ed il barat linguistic: las participantas ed ils participants scrivan – ensemen cun in giuvenil d’ina autra regiun linguistica e cun agid dad auturas ed auturs da tut las quatter regiuns linguisticas – ina curta istorgia ch’els preschentan silsuenter a la giuria ed a las autras participantas ed als auters participants. Ils trais megliers tandems gudognan bons da cumpra en la valur totala da CHF 1’800 per differentas butias e/u entradas en ils pli bels museums da la Svizra.
Termins
- Ultim termin d’annunzia: 31 da schaner 2025
- Ultim termin per inoltrar contribuziuns: 15 da favrer 2025
Annunzia online: cliccai qua.
Finamiras
Cun Linguissimo vul il Forum Helveticum promover la chapientscha ed il barat dals giuvenils che derivan da las differentas regiuns linguisticas da noss pajais, svegliar lur interess per la plurilinguitad svizra ed als sustegnair da duvrar las linguas naziunalas en la pratica.
A la concurrenza pon sa participar tut ils giuvenils tranter 16 e 21 onns. Ella è però adattada surtut per classas dal stgalim secundar II e dat a las persunas d’instrucziun la pussaivladad da discutar davart la dumonda da la plurilinguitad en Svizra. Tranter tut las classas che s’annunzian per la concurrenza vegni tratg la sort per in premi unic da CHF 500 per la cassa da la classa.
Figurativ: Pixabay
Commentaris