20. September 2021
Terz Di dal plurilinguissem
Ils 22 da settember 2021 ha lieu per la terza giada il «Di dal plurilinguissem» en il parlament – parallelamain cun ils Dis dal plurilinguissem da l‘administraziun federala. La finamira da quest di è da promover il barat e la chapientscha tranter las differentas cuminanzas linguisticas e da mussar la ritgezza linguistica e culturala da la Svizra.
Las parlamentarias ed ils parlamentaris vegnan encuraschads da s’exprimer en in’autra lingua naziunala che l’atgna e da tractar las linguas minoritaras rumantsch e talian cun attenziun speziala. Quest onn porschan ils secretariats da las gruppas parlamentaras «Plurilinguitad CH», «ITALIANITÀ» e «Lingua e cultura rumantscha» e da la Helvetia Latina in sustegn da translaziun via e-mail.
La Helvetia Latina e las gruppas parlamentaras surmenziunadas organiseschan plinavant sco finiziun dal di ina maisa radunda e silsuenter in apero ritg. A basa da la publicaziun «Les langues du pouvoir (Las linguas da la pussanza)» discutan Jorge Kühni, vicedirectur da l’Uffizi federal da persunal, Nicoletta Mariolini, delegada federala per la plurilinguitad e prof. dr. Daniel Kübler, coautur dal studi e professer a l’Universitad da Turitg, davart il plurilinguissem en l’administraziun federala. L’inscunter ha lieu da las 19:00 fin las 20:15 en la Chasa federala a Berna, 3. auzada (stanza 3.01). Suenter l’occurrenza datti in apero ritg en il restaurant Lorenzini (Hotelgasse 10, 3011 Berna).
Sco gia l’onn precedent han las parlamentarias ed ils parlamentaris la pussaivladad da frequentar ils 23 da settember ina lecziun d’introducziun en la lingua e cultura rumantscha, organisada dals Servetschs dal parlament.
Gugent As gidain nus ad organisar intervistas avant u durant l’occurrenza ed As dain ulteriuras infurmaziuns en connex cun il plurilinguissem en Svizra. Dumondas ad: info@forum-helveticum.ch.
Ulteriurs contacts
Laurent Wehrli, cusseglier naziunal e president da Helvetia latina
079 221 80 62, laurent.wehrli@parl.ch
Hans Stöckli, cusseglier dals chantuns e president da la gruppa parlamentara «Mehrsprachigkeit CH»
079 770 83 58, hans.stoeckli@parl.ch
Anna Giacometti, cussegliera naziunala e copresidenta da la gruppa parlamentara «Italianità»
079 403 68 22, anna.giacometti@parl.ch
Marco Romano, cusseglier naziunal e copresident da la gruppa parlamentara «Italianità»
079 425 14 31, marco.romano@parl.ch
Martin Candinas, cusseglier naziunal e president da la gruppa parlamentara «Lingua e cultura rumantscha»
078 841 66 86, martin.candinas@parl.ch
Commentaris