13. Januar 2021
Linguissimo: Probablamain il pli grond guid da viadi da giuvenils svizzers
Linguissimo è dapli che mo ina concurrenza linguistica: sin la charta interactiva da la Svizra da Linguissimo pon giuvenils chargiar si in text ed in maletg da lur lieu preferì. Passa 600 contribuziuns – da Genevra fin en il Grischun, da Schaffusa fin en il Tessin, da Son Gagl fin en il Vallais – mussan ils lieus ils pli impurtants per la giuventetgna svizra.
Tgi che vul savair tge lieus ch’inspireschan la giuventetgna svizra, chatta respostas interessantas sin la charta interactiva da Linguissimo. Qua han giuvenils tranter 16 e 21 onns e classas dal stgalim secundar II la pussaivladad da s’occupar a moda creativa cun las linguas naziunalas e las regiuns linguisticas. Per prender part da la concurrenza svizra da las linguas ston las participantas ed ils participants chargiar sin la pagina in text davart in tema definì – quest onn davart il tema «Portas» – ed inoltrar in ulteriur text en in’autra lingua naziunala davart in’experientscha plurilingua. Uschia contribuesch’ins a la creaziun d’in guid da viadi singular sur ils cunfins linguistics ora e po – gist uss en temps da corona – tuttina viagiar a moda virtuala e scuvrir chantuns da la Svizra inspirants.
Ina giuria tscherna las 30 meglras contribuziuns e las auturas ed ils auturs da quels texts vegnan envidads a la fin d’emna da final a Soloturn. Là inscuntran els auturas ed auturs svizzers da crimi e scrivan en in tandem biling ina curta istorgia criminala. Il final metta en il center l’inscunter cun persunas d’autras regiuns linguisticas e duai mussar ch’ins na sto betg savair perfetgamain ina lingua per communitgar in cun l’auter. Ils trais megliers teams gudognan in viadi cuminaivel en ina metropola europeica u ad in’occurrenza culturala en Svizra. Plinavant pon ins gudagnar 500 francs per la cassa da classa.
Il termin d’annunzia per la 13avla ediziun da la concurrenza svizra da las linguas Linguissimo scada prest: giuvenils e classas pon anc s’inscriver fin ils 31 da schaner 2021. Las contribuziuns pon ins inoltrar fin ils 15 da favrer 2021.
Linguissimo vegn organisà dapi il 2008 dal Forum Helveticum, l’organisaziun per la chapientscha linguistica e culturala en Svizra, e da ses partenaris. Las infurmaziuns davart la participaziun ed indicaziuns didacticas per las persunas d’instrucziun datti en tut las quatter linguas naziunalas sin la pagina-web www.linguissimo.ch.
Contact per las medias: Quinta Schneiter, manadra da project, Forum Helveticum, info@linguissimo.ch u t 062 888 01 25.
Colliaziun medias: http://linguissimo.ch/ch/medias-2
Cun sustegn da:
Commentaris