24. September 2020
Il segund «Di dal plurilinguissem» è stà in success
Il segund «Di dal plurilinguissem» ils 24 da settember 2020 ha chattà grond interess ed ha demussà: las commembras ed ils commembers dal parlament e da l’administraziun federala èn impurtants exempels per la societad.
Cun entusiassem han las parlamentarias ed ils parlamentaris participà durant la sessiun d’atun al «Di dal plurilinguissem» ils 24 da settember 2020, inizià l’onn 2019 da Helvetia Latina en collavuraziun cun las gruppas parlamentaras «Mehrsprachigkeit CH», «Italianità» e «Lingua e cultura rumantscha». Numerusas commembras e numerus commembers dal parlament èn s’exprimids en in’autra lingua naziunala che l’atgna ed han participà cun grond interess al curs d’introducziun en la lingua e cultura rumantscha, organisà da la Lia Rumantscha.
A la sairada organisada da Helvetia Latina e da las gruppas parlamentaras «Mehrsprachigkeit CH», «Italianità» e «Lingua e cultura rumantscha» è il cusseglier federal Ignazio Cassis s’exprimì en favur da la coesiun naziunala e da la chapientscha vicendaivla sur ils cunfins linguistics. Hans Stöckli, il president dal Cussegl dals chantuns e president da la gruppa parlamentara «Mehrsprachigkeit CH», ha accentuà che la Svizra sco naziun fundada sin la voluntad politica pretendia che tut las persunas da tut las quatter linguas possian viver en noss pajais cun ils medems dretgs. La presidenta dal Cussegl naziunal Isabelle Moret ha suttastritgà che er ils numerus dialects contribueschian sper las quatter linguas naziunalas a la ritgezza culturala da la Svizra.
L’autura Nicole Bandion ha preschentà il cudesch quadriling «Ün viadi e 4 servezzans – 4 piccioni con una fava – D’une pierre 4 coups – 4 Fliegen mit einer Klappe» che tracta las differentas expressiuns idiomaticas da las quatter linguas naziunalas. Gilles Marchand, il directur general da la SRG SSR, ha preschentà la nova plattafurma da streaming «Play Suisse» ed ha accentuà l’impurtanza da la plurilinguitad en il service public.
Qua chattais Vus la communicaziun a las medias
Commentaris