21. September 2020
Segund «Di dal plurilinguissem» en il Parlament federal ed en l’administraziun federala
Ils 24 da settember 2020 ha lieu per la segunda giada il «Di dal plurilinguissem» en il parlament, inizià da Helvetia Latina en collavuraziun cun las gruppas parlamentaras «Mehrsprachigkeit CH», «Italianità» e «Lingua e cultura rumantscha».
La finamira dal «Di dal plurilinguissem» è da promover il barat e la chapientscha d’umans da las differentas cuminanzas linguisticas e da mussar la ritgezza linguistica e culturala da la Svizra. Las parlamentarias ed ils parlamentaris vegnan encuraschads da s’exprimer en in’autra lingua naziunala ch’en l’atgna. Ultra da quai pon els participar da mezdi ad in’introducziun en la lingua e cultura rumantscha.
Sco finiziun festiva dal di ha lieu la preschentaziun dal cudesch «Ün viadi e 4 servezzans – 4 piccioni con una fava – D’une pierre 4 coups – 4 Fliegen mit einer Klappe», concepì da Nicole Bandion. La publicaziun cumpareglia a moda umoristica las expressiuns idiomaticas da nossas linguas naziunalas.
Il program cumpiglia ultra da quai pleds dal cusseglier federal Ignazio Cassis, da la presidenta dal Cussegl naziunal Isabelle Moret e dal president dal Cussegl dals chantuns Hans Stöckli sco era dal directur general da la SRG SSR Gilles Marchand che preschenta la nova plattafurma da streaming «Play Suisse».
Commentaris