24. April 2017
L’«inscunter da linguas» per giuvenils svizzers arriva a Berna
Il novavel final da la concurrenza naziunala da las linguas „Linguissimo“ ha lieu ils 29 e 30 d’avrigl 2017 a Berna. L’occurrenza organisada mintg’onn dal Forum Helveticum e ses partenaris envida var trenta giuvenils da l’entira Svizra a surpassar ils cunfins linguistics ed a sa famigliarisar cun in gener litterar definì. Ils finalists da las quatter regiuns linguisticas pon inscuntrar quest onn columnists umoristics en il center da la chapitala. Per ils megliers texts datti in viadi en ina citad europeica.
Ils 29 finalists èn vegnids tschernids d’ina giuria tranter ils duatschient auturs giuvens che han inoltrà in text davart il tema „Mia citad sutsura“ en l’emprima runda da la concurrenza il favrer 2017. Durant il final – numnà er „inscunter da linguas“ – emprendan ils giuvenils d’enconuscher ils columnists ed umorists Fadrina Hofmann (GR), Etrit Hasler (SG), Sergio Savoia (TI) e Carlos Henriquez (NE). Quels introduceschan ils giuvenils en l’art da scriver ina columna umoristica. Il final, organisà dal Forum Helveticum, cun il sustegn finanzial da l’Uffizi federal da cultura, da la Fundaziun Oertli, la Fundaziun Göhner e la Fundaziun Binding, dat a quests giuvenils tranter 16 e 21 onns la schanza da scriver ensemen cun camaratas e camarats d’autras regiuns linguisticas texts plurilings. Ils sis victurs da quest final pon viagiar ensemen en ina citad europeica.
Il public ed ils represchentants da las medias èn cordialmain envidads a la preschentaziun dals texts dal final da Linguissimo dumengia, ils 30 d’avrigl a las 13.45 en il “Jugend- und Kulturzentrum Gaskessel“ (Sandrainstrasse 25, 3007 Berna). Dapli infurmaziuns davart il project sin www.linguissimo.ch.
Infurmaziuns a las medias: Christine Matthey, directura Forum Helveticum, info@linguissimo.ch ubain t 062 888 01 25
Cun sustegn da:
Commentaris