L’associaziun

Il Forum Helveticum è vegnì fundà il 1968 sco associaziun independenta e neutrala en dumondas religiusas e politicas. Il Forum Helveticum è in lieu d’inscunter e da dialog che sa deditgescha a las dumondas da la vita publica.

Sco center da cumpetenza per la chapientscha linguistica e culturala promova il Forum Helveticum la chapientscha en la societad, la politica, l’economia e la cultura. El s’engascha oravant tut per la chapientscha tranter las cuminanzas linguisticas en Svizra e per la coesiun naziunala.

Il Forum Helveticum surpiglia en quest sectur incumbensas d’infurmaziun, da cussegliaziun, da sensibilisaziun e da networking. El ha inizià tranter auter il 2015 la nova gruppa parlamentara “Purilinguitad CH” en il Parlament svizzer ed organisescha dapi il 2008 mintg’onn la concurrenza da scriver plurilingua per giuvenils «Linguissimo».

Il «Portal per la chapientscha linguistica e culturala» è disponibel dapi il 2012 en las quatter linguas naziunalas ed en englais. Ils cuntegns pon vegnir proponids dal Forum Helveticum sez u d’organisaziuns partenarias. Nus essan averts per propostas u giavischs.

L’associaziun realisescha sias finamiras en collavuraziun cun autras organisaziuns ed instituziuns cun finamiras sumegliantas. Commembers dal Forum Helveticum èn persunas natiralas e giuridicas. Questas ultimas pon esser organisaziuns, instituziuns ed associaziuns (da tetg) naziunalas, regiunalas u chantunalas. Ils 32 commembers collectivs actuals dal Forum Helveticum èn activs en champs politics, culturals, confessiunals, economics, civics u d’utilitad publica. Ils organs dal Forum Helveticum èn la radunanza da delegads, la cumissiun directiva ed il post da revisiun.

Ils statuts da l’uniun èn disponibels per tudestg e franzos.