Il Forum Helveticum, fundà il 1968 sco lieu d’inscunter e da dialog, s’engascha per la chapientscha linguistica e culturala tranter las differentas regiuns da la Svizra. Il forum è activ en ils secturs societad, politica, economia e cultura e surpiglia incumbensas d’infurmaziun, da cussegliaziun, da sensibilisaziun e da networking.
27. Oktober 2021
La nova ediziun 2021/2022 da LINGUISSIMO è lantschada!
La nova ediziun da la concurrenza svizra da las linguas LINGUISSIMO è lantschada! Questa giada vai per il tema «ramurs». Il motto da la concurrenza 2021/2022 envida da scriver texts che tractan ramurs ch’ans circumdeschan. Il mund tuna: dal schuschurar dal traffic d’autos en citad, il scalinar da las stgellas en champagna fin al tgular dal palantschieu en ina chasa veglia.
23. September 2021
In sguard enavos sin il terz «Di dal plurilinguissem» en il parlament
Plurilinguitad: lain ristgar! Numerusas parlamentarias e numerus parlamentaris han suandà oz quest appel a chaschun dal «Di dal plurilinguissem» en il parlament svizzer. Els èn s’exprimids en in’autra lingua naziunala che l’atgna ed han accentuà l’impurtanza da la communicaziun sur ils cunfins linguistics. A chaschun d’ina maisa radunda davart il plurilinguissem en l’administraziun federala èn vegnidas discutadas las schanzas e sfidas che quel porta. Dapli
20. September 2021
Terz Di dal plurilinguissem
Ils 22 da settember 2021 ha lieu per la terza giada il «Di dal plurilinguissem» en il parlament – parallelamain cun ils Dis dal plurilinguissem da l‘administraziun federala. La finamira da quest di è da promover il barat e la chapientscha tranter las differentas cuminanzas linguisticas e da mussar la ritgezza linguistica e culturala da la Svizra. Dapli
10. September 2021
Info – PluriCH n°26
«Info – PluriCH» è in document da sintesa che preschenta l’actualitad da la plurilinguitad svizra en in’egliada. El è destinà spezialmain per la gruppa parlamentara «plurilinguitad CH».
Ediziun actuala: Info-PluriCH n°26 – Atun 2021
Anteriuras ediziuns qua.
2. September 2021
In final criminal a la concurrenza svizra da las linguas LINGUISSIMO a Soloturn
29 giuvnas scripturas talentadas e giuvens scripturs talentads da tut las Svizra èn s’inscuntrads ils 28 ed ils 29 d’avust 2021 a Soloturn al final da la concurrenza svizra da linguas Linguissimo. Lur incumbensa: scriver in’istorgia criminala, e quai sur ils cunfins linguistics. Ina giuria d’auturas e d’auturs svizzers ha tschernì las meglras ovras: las set victuras e victurs ventiraivels dals chantuns AG, FR, GE, GR e VD gudognan in viadi communabel en ina citad europeica ubain ad in’occurrenza culturala en Svizra. Il Forum Helveticum organisescha Linguissimo dapi il 2008. Dapli
23. August 2021
Giuvnas scripturas talentadas e giuvens scripturs talentads sin ils fastizs dal crimi e da la plurilinguitad a Soloturn
30 giuvenils da tut la Svizra s’inscuntran a Soloturn a chaschun dal tredeschavel final da la concurrenza svizra da las linguas Linguissimo. En il center stat il crimi e l’inscunter pluriling. L’occurrenza organisada dal Forum Helveticum ha lieu ils 28 ed ils 29 d’avust 2021 en la Biblioteca centrala da Soloturn ed en il chastè da Waldegg. Da gudagnar datti in viadi en ina citad europeica ubain ad in’occurrenza culturala en Svizra. Dapli