---

SRG SSR

La SSR è in'interpresa da medias organisada tenor il dretg privat e manada tenor ils princips dal dretg d'aczias, ed ella è obligada da porscher in service public. Sia incumbensa sa basa sin la Constituziun federala, sin la lescha da radio e televisiun (LRTV) sco era sin la concessiun. Giuridicamain è la SSR in’uniun. Sco interpresa da nonprofit sa finanziescha la SSR per radund 70 pertschient sur las taxas e per var 30 pertschient sur sia activitad commerziala. Ella è politicamain ed economicamain neutrala.

La SSR cumpiglia 5 unitads d'interpresa: Radiotelevisione svizzera (RSI), Radiotelevisiun Rumantscha (RTR), Radio Télévision Suisse (RTS), Schweizer Radio und Fernsehen (SRF) e Swissinfo. La SSR cumpiglia era 6 societads affiliadas.

Ella è la pli gronda interpresa per medias electronicas en Svizra cun circa 6000 emploiadas ed emploiads u 5000 plazzas a temp cumplain, ina svieuta annuala da var 1,6 mia. francs, 18 programs da radio ed 7 programs da televisiun, sco era paginas d'internet e servetschs da teletext cumplementars. Cun ses programs da radio e – durant il temp d'emissiun principal – era cun ils programs da televisiun è ella en tut las quatter regiuns linguisticas a la testa dal martgà e sa fa valair cun success cunter numerus concurrents esters bler pli bainstants.

 

---