28. September 2023
Sguard enavos sin il tschintgavel «Di dal plurilinguissem» en il parlament
Ils 27 da settember 2023 ha gì lieu il tschintgavel «Di dal plurilinguissem». La finamira da quest di èsi da motivar las parlamentarias ed ils parlamentaris da s’exprimer en in’autra lingua naziunala che lur atgna. Quel di aud’ins pia la diversitad linguistica tipica per la Svizra anc pli savens che usità en ils differents votums. En il rom d’ina occurrenza sur mezdi organisada da Helvetia Latina e da las gruppas parlamentaras «Plurilinguitad CH», «ITALIANITÀ» e «Lingua e cultura rumantscha» han las commembras ed ils commembers dal parlament quest onn gì la pussaivladad da s’infurmar davart ina retscha da purschidas en connex cun barats da classas da scola, tranter auter da l’agentura Movetia.
Parlamentarias e parlamentaris dad omaduas chombras ed era represchentantas e represchentants dal Cussegl federal han formulà durant il tschintgavel «Di dal plurilinguissem» ina part da lur votums en in’autra lingua naziunala che lur atgna. Las linguas minoritaras talian e rumantsch han survegnì attenziun speziala. Las commembras ed ils commembers dals cussegls han uschia dà suatientscha a l’appel da Helvetia Latina e da las gruppas parlamentaras «Plurilinguitad CH», «ITALIANITÀ» e «Lingua e cultura rumantscha» che han prendì l’iniziativa l’onn 2019 dad instituziunalisar quest di pluriling.
A chaschun d’ina occurrenza sur mezdi organisada da las gruppas menziunadas è vegnì discutà a moda animada davart las pussaivladads da promover il barat da classas da scola a l’intern da la Svizra. In pèr da las parlamentarias e dals parlamentaris preschents han prendì la chaschun da s’engaschar persunalmain per in barat e sa participeschan uss a la «Challenge per parlamentari:as», ina concurrenza planisada da Movetia en vista da l’emprima emna da barat naziunala dals 13 fin ils 17 da november 2023.
Commentaris