12. Mai 2019
Giuventetgna, poesia e plurilinguitad gudognan a Cuira
Les gagnants / Die Gewinner / I vincitori / Ils victurs: Joël Biland (FR), Prisca Degli Antoni, Cheyenne Gut (TG), Marie Christinet (VD), Saiorse Krähenmann (TG), Daria Joos (GR)
Durant l’indeschavel final da Linguissimo, che ha gì lieu ils 11 e 12 da matg 2019 a Cuira, èn var trenta giuvenils da l’entira Svizra s’inscuntrads per scriver poesias sur ils cunfins linguistics ora. Questa ediziun da la concurrenza linguistica naziunala ch’il Forum Helveticum organisescha mintg’onn han gudagnà ina Tessinaisa, in Friburgais, ina Vadaisa, ina Grischuna e duas Turgovianas. Els èn ils auturs dals trais megliers texts ch’èn vegnids scrits en gruppas plurilinguas da dus e da trais. Els gudognan in viadi communabel en ina citad europeica.
La concurrenza linguistica naziunala per giuvenils Linguissimo vegn realisada dapi il 2008 dal Forum Helveticum, l’organisaziun per la chapientscha linguistica e culturala en Svizra, e sias partenarias. En il final ils 11 e 12 da matg 2019 han las participantas ed ils participants inscuntrà differentas poetessas e differents poets: Nathalie Schmid (AG), Eric Duvoisin (VD), Pierre Lepori (TI) e Dominique Dosch (GR). Per l’ediziun 2019 hai dà bunamain 300 annunzias. Da quellas ha la giuria tschernì anticipadamain ils giuvenils da 16 fin 21 onns per il final. Els han scrit dus texts en duas differentas linguas naziunalas: per l’ina in text davart in lieu d’impurtanza per els e per l’autra in’anecdota persunala davart il tema emprender linguas.
La dumengia suentermezdi han las finalistas ed ils finalists da las quatter regiuns linguisticas preschentà en la Lia Rumantscha lur creaziuns da la fin d’emna a la giuria. Las poesias ch’els han scrit en tandems e trios plurilings reflecteschan la creativitad en tut las linguas naziunalas. Grazia a la collavuraziun cun la Lia Rumantscha èn las participantas ed ils participants plinavant sfunsads en la cultura rumantscha cun in crashcurs da rumantsch ed in concert dad Astrid Alexandre. Las sis victuras e victurs da l’ediziun 2019 derivan dals chantuns Grischun, Friburg, Tessin, Vad e Turgovia e represchentan ina giuventetgna svizra mirvegliusa ed inspirada da las differentas culturas da ses pajais. Els gudognan in viadi communabel en ina citad europeica.
Il premi da CHF 500.– per la cassa da classa ha gudagnà suenter l’emprima runda la classa 1F4 da dunna Anna Pedrojetta dal collegi Sainte-Croix a Friburg. Inqual participanta e participant vegn plinavant envidà da preleger ses texts ils 16 d’avust 2019 a Zuoz en il rom da la festa da giubileum da la Lia Rumantscha.
Davart la proxima ediziun da la concurrenza linguistica Linguissimo infurmain nus a partir da l’atun 2019 sin la pagina-web www.linguissimo.ch. Tut ils giuvenils da 16 fin 21 onns en Svizra èn cordialmain envidads da sa participar.
Infurmaziuns a las medias:
Christine Matthey, directura Forum Helveticum, info@linguissimo.ch ubain t 062 888 01 25.
Link medias: http://linguissimo.ch/ch/medias-2/
Cun sustegn da:
Commentaris