6. Mai 2019
Il final naziunal da Linguissimo a Cuira daventa poetic!
L’indeschavel final da la concurrenza naziunala da las linguas Linguissimo ha lieu ils 11 e 12 da matg 2019 en las localitads da la Lia Rumantscha a Cuira. L’occurrenza organisada mintg’onn dal Forum Helveticum envida trenta giuvenils da l’entira Svizra a surpassar ils cunfins linguistics ed a sa famigliarisar cun in gener litterar definì – quest onn cun la poesia. Gudagnar pon els in viadi en ina citad europeica.
Ils 30 finalists da las quatter regiuns linguisticas èn vegnids tschernids d’ina giuria che ha examinà var 250 texts inoltrads da participants tranter 16 e 21 onns. En l’emprima runda han ils giuvenils scrit davart in lieu en Svizra ch’è impurtant per els. Durant il final emprendan ils giuvenils d’enconuscher ils artists Nathalie Schmid (AG), Eric Duvoisin (VD), Pierre Lepori (TI) e Dominique Dosch (GR) ch’introduceschan ils giuvenils en l’art da scriver poesias.
Il final dat als giuvenils la schanza da scriver texts plurilings ensemen cun camaratas e camarats d’autras regiuns linguisticas. Quest onn survegnan els, grazia ad ina collavuraziun cun la Lia Rumantscha, in’invista pli profunda en la cultura rumantscha cun in pitschen curs linguistic ed in concert dad Astrid Alexandre. Ils sis victurs da quest final pon far ensemen in viadi en ina citad europeica.
Ils represchentants da las medias èn cordialmain envidads a la preschentaziun da las poesias dals finalists da Linguissimo che ha lieu ils 12 da matg 2019 a las 13.30 en las localitads da la Lia Rumantscha (Via da la Plessur 47, 7001 Cuira) – nus supplitgain per ina preannunzia.
La concurrenza Linguissimo vegn organisada dapi il 2008 dal Forum Helveticum, l’organisaziun per la chapientscha linguistica e culturala en Svizra, e da ses partenaris. Dapli infurmaziuns davart il project chattais Vus sin www.linguissimo.ch.
Infurmaziuns a las medias:
Christine Matthey, directura Forum Helveticum, info@linguissimo.ch ubain via t 062 888 01 25.
Link per las medias: http://linguissimo.ch/ch/medias-2/
Cun sustegn da:
Commentaris