---

OSL Ovra Svizra da Lectura per la Giuventetgna

L’OSL Ovra Svizra da Lectura per la Giuventetgna publitgescha texts litterars e texts tematics per uffants e giuvenils en las 4 linguas naziunalas
 
L’OSL Ovra Svizra da Lectura per la Giuventetgna publitgescha dapi il 1931 texts litterars e texts tematics per giuvnas lecturas e giuvens lecturs en las 4 linguas naziunalas, rumantsch en 5 idioms ed en rumantsch grischun. L’OSL è dapi il 1952 ina fundaziun d’utilitad publica. Mintg’onn vegnan publitgads radund 30-40 titels novs, per gronda part d’auturas e d’auturs svizzers.
Cun il programm pluriling presta l’OSL ina contribuziun considerabla al barat linguistic e cultural en Svizra. Las publicaziuns promovan gia tar las lecturas e tar ils lecturs ils pli giuvens sco era tar persunas d’instrucziun la conscienza d’ina viva diversitad linguistica en Svizra.
 
Titels en pliras linguas datti t.a. da Peter Bichsel, Franz Hohler, Ilma Rakusa, Eleonore Frey, Tim Krohn, Michel Tournier, Daniel de Roulet, Bernard Friot, Nicolas Robel, Germano Zullo, Leo Tuor, Jens Nielsen, Franz Kafka, James Joyce, Isaac Bashevis Singer e Kurt Schwitters.

---