---

Biblioteca naziunala svizra

La Biblioteca naziunala svizra (BN) è ina da las pli grondas bibliotecas da noss pajais. Sco center da cumpetenza e da servetschs modern ed accessibel è ella in lieu d’inscunter per persunas che studegian e fan retschertgas. Ella ospitescha la pli gronda collecziun da publicaziuns davart la Svizra sin tut il mund. Uschia conserva ella ina part impurtanta dal patrimoni cultural dal pajais. Sco ina da las paucas bibliotecas naziunalas è quella svizra accessibla al public.
 
En la BN chattan ins ovras stampadas da tut gener ed er publicaziuns electronicas e da multimedia. La BN collecziunescha documents da tut las parts da la Svizra ed en tut las linguas naziunalas. Ma ella acquista er documents da l’ester u en autras linguas che tematiseschan la Svizra u ch’èn vegnids scrits ubain translatads d’ina Svizra u d’in Svizzer.
 
Las collecziuns spezialas èn las perlas da la biblioteca: l’Archiv svizzer da litteratura, la Collecziun grafica ed il Centre Dürrenmatt Neuchâtel.
 
En l’Archiv svizzer da litteratura sa chattan ils relaschs ed archivs da scripturas e scripturs ed er da scienziadas e scienziads da tut las regiuns linguisticas, ma er d’auturas e d’auturs esters che han in liom cun la Svizra. Gronds nums enconuschents èn per exempel Friedrich Dürrenmatt, Blaise Cendrars, Patricia Highsmith, Giovanni Orelli, Andri Peer u Robert Walser (sco deposit da la Fundaziun Robert Walser). La Collecziun grafica cumpiglia in grond fond da fotografias da persunas e da cuntradas, da placats, cudeschs d’artists, portfolios, ediziuns ed ovras dals Schweizer Kleinmeister ed tant sco l’Archiv federal dals monuments istorics. Ella acquista er singuls archivs d’artists sco p.ex. quel da Daniel Spoerri.
 
Il Centre Dürrenmatt Neuchâtel è in museum per l’ovra artistica e litterara da Friedrich Dürrenmatt. Ses purtrets e ses dissegns èn conservads en quest center cultural.
 
Las collecziuns da la BN cumpiglian entant passa tschintg milliuns documents. Grazia ad ina documentaziun ed intermediaziun professiunala èn ellas in fond indispensabel per l’istoriografia, per la scienza litterara e la scienza da l’art. Bibliotecaras e bibliotecars professiunals sustegnan las retschertgas davart tematicas svizras e localiseschan er funtaunas che na sa chattan betg en la BN.
 
La conservaziun tenor standards internaziunals garantescha che las collecziuns da la BN èn accessiblas er a las generaziuns futuras.
 

Catalogs

Cudeschs, gasettas, revistas, documents electronics: Helveticat
www.nb.admin.ch/helveticat
Archivs (Archiv svizzer da litteratura, Collecziun grafica):
www.nb.admin.ch/helveticarchives

---