---

Lia Rumantscha

Il rumantsch ha fadia da sa far valair. El croda savens en emblidanza. La tutpreschientscha dal tudestg e la ferma influenza da l'englais èn dus motivs, pertge ch'il rumantsch vegn chatschà pli e pli a chantun. La Lia Rumantscha (LR) ha ina visiun: «Era las proximas generaziuns dovran cun plaschair il rumantsch.» Cun sias purschidas vul ella motivar las Rumantschas ed ils Rumantschs da discurrer e da scriver lur lingua en il mintgadi.

La LR cun sedia a Cuira e posts regiunals a Laax Laax, Zernez, Savognin e Ziràn è vegnida fundada il 1919 sco organisaziun da tetg da tut las uniuns linguisticas rumantschas. Ella è in’instituziun d’utilitad publica ed è politicamain e confessiunalmain neutrala. En il rom da sia incumbensa da dretg public attribuida da la Confederaziun ed il chantun Grischun porscha ella differents servetschs.

La Lia Rumantscha sustegna, promova e coordinescha ils projects da las organisaziuns regiunalas e surregiunalas en favur da lingua e cultura rumantscha. Ella s’engascha per la promoziun ed il mantegniment dal rumantsch e represchenta la Rumantschia en ils differents champs da la vita sociala e statala entaifer ed ordaifer il territori rumantsch tradiziunal. Ils delegads da questas uniuns affiliadas decidan ina giada l'onn a chaschun da la radunanza da delegads dal program da lavur e dal budget da la Lia Rumantscha.

Ils accents da la Lia Rumantscha èn tematicas linguisticas e politic-culturalas. Ils temas centrals èn: politica (fusiuns da vischnancas), furmaziun (scola rumantscha futura, furmaziun da creschids), lingua (promoziun da la lingua discurrida e lingua scritta, lingua da standard u surregiunala rumantsch grischun ed idioms) e la cultura (promoziun d’artistas ed artists rumantschs, lecturas per uffants e giuvenils).

In pèr exempels da servetschs da la Lia Rumantscha
Banca da datas linguisticas Pledari Grond Online, Servetsch da translaziuns en rumantsch grischun ed en ils tschintg idioms, curs da rumantsch e d’integraziun, vacanzas activas per famiglias, products e medias per uffants e giuvenils, libraria online cun passa 2'300 artitgels.

---