---

Associaziun per promover l’instrucziun plurilingua en Svizra (APEPS)

Istorgia
La fin dals onns 1980 han scolas, partiziuns, persunas d’instrucziun, direcziuns da scolas sin tut ils stgalims cumenzà a sviluppar models per l’instrucziun bilingua. Per segirar l’infurmaziun e la coordinaziun e per crear ina rait dals differents acturs, ha l’anteriura cumissiun L2 da la CDEP organisà il 1993 in forum per l’instrucziun bilingua. Dus projects èn naschids dal forum: la decleranza da la CDEP davart l’instrucziun bilingua l’onn 1995 e la fundaziun da l’Associaziun per promover l’instrucziun plurilingua en Svizra (APEPS) l’onn 1994. Dapi sia fundaziun unescha l’associaziun persunas che s’engaschan en la scienza, en la furmaziun e l’instrucziun sin tut ils stgalims, autoritads da scola sco era geniturs e glieud che s’interessa per il svilup da la plurilinguitad en scola, sco p.ex. l’immersiun, l’instrucziun d’in rom en ina segunda lingua u en ina lingua estra, projects u moduls plurilings, il svilup da l’abilitad da leger e scriver en pliras linguas, projects plurilings per uffants da migraziun, stgomis reals e virtuals etc.

Activitads
L’APEPS organisescha mintg’onn colloquis davart divers aspects da l’instrucziun bilingua e davart sias variantas sco er autras activitads sco moduls da furmaziun cuntinuanta, visitas da classa, viadis da studi etc. Ses focus sa drizza sin tut las linguas naziunalas, las linguas da migraziun, l’englais e tut las variantas linguisticas, las qualas han ina muntada per construir savida ed identitad. Il comité ed ils commembers da l’APEPS collavuran cun divers partenaris per realisar las suandantas sfidas: concepir l’instrucziun bilingua, evaluar models d’instrucziun bilingua, per la didactica d’immersiun, per la furmaziun e la furmaziun cuntinuanta, per realisar models d’instrucziun bilingua, per render enconuschent il savair davart l’instrucziun bilingua e sias variantas e per crear ina rait da persunas interessadas. 

Partenaris
Ils ca. 160 commember da l’APEPS vegnan per gronda part da la Svizra e da l’exteriur cunfinant. Ella collavura cun autras instituziuns da la Svizra e da l’ester che han finamiras sumegliantas u che s’occupan da las medemas activitads sco l’associaziun. Ella tgira contacts cun tut ils acturs da la societad (autoritads, medias, furmaziun e scolaziun, scienza, geniturs etc.).

---