24. Juni 2025
Linguissimo a Delémont: in final plain poesia
Ils 14 e 15 da zercladur 2025 èn 27 giuvens talents da scriver da tut las parts da la Svizra sa scuntrads a Delémont al grond final da la concurrenza naziunala da scriver Linguissimo. En teams maschadads han els scrit poesias en duas u pliras linguas e preschentà quellas ad ina giuria ed al public. Ina giuria d’expert:as da tut las quatter regiuns linguisticas ha tschernì las trais pli creativas ed inspirantas contribuziuns. Las set victuras derivan dals chantuns BE, FR, GR, TI e VD.
Ils texts da finalistas e finalists èn da chattar sülla pagina d’internet da Linguissimo.
L’occurrenza da scriver quadrilingua Linguissimo s’adressescha a giuvenils tranter 16 e 21 onns, en spezial a classas da scola dal stgalim secundar II. Per sa participar a l’occurrenza han ils giuvenils scrit dus texts en duas differentas linguas naziunalas. L’emprim text da l’ediziun da quest onn ha tractà il tema «Viadi en il temp». Il segund text pli curt tematisescha ina experientscha persunala cun linguas estras u la plurilinguitad. Quest onn han passa 300 giuvenils da l’entira Svizra inoltrà lur texts. Quai è in record.
Auturas ed auturs cun las pli creativas contribuziuns èn vegnids envidads d’ina giuria naziunala al final sut il motto «Poesia» che ha gi lieu ils 14 e 15 da zercladur en l’albiert da giuventetgna a Delémont. Durant la fin d’emna dal final han Blake Eduardo Carreno (franzos), Sara Francesca Hermann (rumantsch), Jovana Nikic (tudestg) e Andrea Noseda (talian) introducì ils giuvenils cun lavuratoris en il scriver poetic.
Silsuenter han las participantas ed ils participants scrit en tandems bi- u plurilings poesias che èn vegnidas preschentadas a la giuria ed allas participantas ed als participants. Suenter las presentaziuns han la giuria gì l’incumbensa difficila da tscherner il trais tandems che han scrit las pli bellas poesias cun risguardar l’orginalitad e la qualitad formala dals texts.
Commentaris