8. Oktober 2024
Sguard enavos sin il sisavel Di dal plurilinguissem en il parlament
Ils 26 da settember 2024 ha gì lieu en il Parlament federal per la sisavla giada il «Di dal plurilinguissem», in’occurrenza che vegn organisada mintg’onn durant la sessiun d’atun da Helvetia Latina e las gruppas parlamentaras «Plurilinguisme CH», «ITALIANITÀ» e «Lingua e cultura rumantscha». La finamira dal di è da promover il barat e la chapientscha tranter las differentas cuminanzas linguisticas da la Svizra e d’accentuar la ritgezza da nossas linguas e culturas.
L’occurrenza envida las parlamentarias ed ils parlamentaris da tuttas duas chombras sco era las commembras ed ils commembers dal Cussegl federal da s’exprimer durant in di en in’autra lingua naziunala che l’atgna e da dar attenziun speziala al talian ed al rumantsch. Ils secretariats da Helvetia Latina e da las gruppas parlamentaras numnadas èn stads a disposiziun per translatar las contribuziuns.
Danovamain han numerusas commembras e numerus commembers dal parlament e dal Cussegl federal suandà quest appel e fatg ina part da lur votums en in’autra lingua che lur lingua materna e/u per talian e rumantsch.
Il «Di dal plurilinguissem» è vegnì concludì cun in aperitiv en la Galerie des Alpes en preschientscha da parlamentarias e parlamentaris e numerus giasts. Ils presidents da las trais gruppas parlamentaras han regurdà a la valur da la plurilinguitad ed a l’impurtanza da s’engaschar per il mantegniment da la varietad linguistica en Svizra. Silsuenter han els surlaschà la tribuna a la chantadura e cumponista rumantscha Martina Linn che ha intgantà il public cun chanzuns en quatter linguas.
Commentaris