6. Februar 2024
Nova cumposiziun e direcziun dal copresidi da la gruppa parlamentara «Plurilinguitad CH»
La gruppa parlamentara «Plurilinguitad CH» è vegnida constituida il 2015 da 15 parlamentaras e parlamentaris cun la finamira da coordinar l’engaschament per la plurilinguitad en Svizra. Dapi lura è la gruppa vegnida cuntinuadamain pli gronda (actualmain 38 commembras e commembers). Dapi la fundaziun è Hans Stöckli, anteriur represchentant dal chantun da Berna en il Cussegl dals chantuns, s’engaschà sco copresident directiv cun corp ed olma per la gruppa. Al cumenzament da la sessiun d’enviern 2023 ha cusseglier naziunal Martin Candinas surpiglià la batgetta.
Il copresidi da la gruppa consista da cusseglier naziunal Martin Candinas (copresident directiv; AdC, GR), cusseglier dals chantuns Hannes Germann (PPS, SH), cussegliera naziunala Anna Giacometti (PLD, GR) e cussegliera dals chantuns Maya Graf (PES, BL) che sa mettan a disposiziun per in’ulteriura legislatura e da las duas novas copresidentas cussegliera dals chantuns Mathilde Crevoisier Crelier (PS, JU) e cussegliera naziunala Céline Weber (PVL, VD).
Il secretariat vegn manà dal Forum Helveticum.
La communicaziun a las medias è disponibla qua.
Commentaris