20. Juni 2022
5avel inscunter da la gruppa parlamentara «Plurilinguitad CH»
Ils 14 da zercladur 2022 ha gì lieu a Berna il 5avel inscunter da la gruppa parlamentara «Plurilinguitad CH». Var 30 persunas participadas èn s’occupadas dal tema «la valur da las linguas naziunalas».
Il 5avel inscunter da la gruppa parlamentara «Plurilinguitad CH», che ha gì lieu ils 14 da zercladur 2022 a Berna, ha tractà la dumonda da la valur da las linguas, betg mo ord optica identitara, sociala u culturala, mabain – e surtut – dal punct da vista economic. A chaschun da questa sentupada ha professer François Grin (Universitad da Genevra, Observatoire Économie-Langues-Formation) preschentà ils emprims resultats dal project da perscrutaziun «APSIS: Vorteile der Schweizer Mehrsprachigkeit: Individuum und Gesellschaft» ch’el e sia collavuratura dr. Ilaria Masiero han realisà. Ils resultats conferman surtut che persunas plurilinguas profitan en media d’entradas pli autas che persunas monolinguas.
Suenter questa preschentaziun èn sa radunads ad ina maisa radunda, moderada da l’autur e schurnalist Christophe Büchi, differents giasts da la perscrutaziun, politica, economia ed administraziun per in’ulteriura discussiun: prof. François Grin ha discurrì cun il cusseglier dals chantuns Hans Stöckli (president da la gruppa parlamentara «Plurilinguitad CH»), David Gaffino (manader da l’Uffizi per bilinguitad, legislaziun e resursas dal chantun da Berna) e Surabhi Pasarakonda (Die Mobiliar, Cultura e transfurmaziun, Human Development) davart lur ideas areguard la valur da las linguas naziunalas – per il singul individi, per interpresas, per la societad, per ils chantuns e per l’entira Svizra.
Commentaris