15. September 2020
Tribuna libra per il final naziunal da LINGUISSIMO a Bellinzona
30 giuvenils da tut la Svizra sa participeschan al dudeschavel final da la concurrenza svizra da las linguas LINGUISSIMO. L’occurrenza organisada dal Forum Helveticum ha lieu ils 26 ed ils 27 da settember 2020 en la Biblioteca chantunala da Bellinzona. En il center stattan ils inscunters plurilings ed il scriver litterar – quest onn davart il tema teater. Da gudagnar datti in viadi en ina citad europeica ubain ad in’occurrenza culturala en Svizra.
Da passa 230 texts inoltrads da giuvnas participantas e giuvens participants da 16 fin 21 onns da tut la Svizra ha la giuria tschernì 30 finalistas e finalists da las quatter regiuns linguisticas. L’incumbensa da l’emprima runda è stada d’inoltrar texts e maletgs en connex cun lieus svizzers ch’èn impurtants per els e che tematiseschan il chavazzin «dschungla». Tut questas contribuziuns creativas èn publitgadas uss en la charta interactiva.
Durant la fin d’emna dal final a Bellinzona survegnan ils giuvenils ina nova incumbensa ch’els ston schliar sco tandem: scriver scenas da teater bilinguas. Per pudair far quai inscuntran ils giuvens scripturs talentads las auturas ed ils auturs svizzers Flavio Stroppini (TI), Christine Schmocker (BE), Michaël Perruchoud (FR) ed Annina Sedláček (GR). Els introduceschan ils giuvenils en la tematica dal scriver tocs da teater. Ina bell’anecdota: la pedagoga da teater Christine Schmocker è sezza stada l’onn 2008 ina da las finalistas da l’emprima ediziun da LINGUISSIMO.
Ultra da quai survegnan ils giuvenils in’invista culturala en il chantun ospitant: la sonda saira introducescha il musicist Marco Zappa els en il stgazi da chanzuns tessinaisas. La dumengia vegnan tschernids las sis victuras e victurs dal final. Els gudognan in viadi communabel en ina citad europeica ubain ad in’occurrenza culturala en Svizra.
Ils collavuraturs da medias èn envidads cordialmain a la prelecziun live da las scenas da teater da las finalistas e dal finalists da LINGUISSIMO la dumengia, ils 27 da settember 2020 a las 13.30 en las localitads da la Biblioteca chantunala da Bellinzona, Palazzo Franscini (Viale S. Franscini 30a, 6501 Bellinzona).
Il cusseglier guvernativ Manuele Bertoli, directur per furmaziun, cultura e sport dal chantun Tessin, e Stefano Vassere, directur dal Sistem bibliotecar dal chantun Tessin, vegnan a beneventar las preschentas ed ils preschents. En consequenza da Covid-19 è il dumber da plazzas limità – nus As supplitgain d’As annunziar ordavant fin il pli tard ils 21 da settember 2020.
La concurrenza LINGUISSIMO vegn organisada dapi il 2008 dal Forum Helveticum, l’organisaziun per la chapientscha linguistica e culturala en Svizra, e da ses partenaris. Dapli infurmaziuns davart il project chattais Vus sin www.linguissimo.ch.
Infurmaziuns a las medias: Quinta Schneiter, directura a.i. dal Forum Helveticum, info@linguissimo.ch ubain via t 062 888 01 25
Communicaziun a las medias in PDF
Link per las medias: http://linguissimo.ch/ch/medias-2/
Commentaris