15. Januar 2020
Concurrenza svizra da las linguas Linguissimo 2019/2020: ultims dis per sa participar!
L’ultim termin d’annunzia per la dudeschavla ediziun da la concurrenza svizra da las linguas Linguissimo s’avischina. S’annunziar pon giuvenils e classas fin ils 31 da schaner 2020. Contribuziuns pon ins inoltrar fin ils 15 da favrer 2020.
La concurrenza da las linguas naziunala Linguissimo porscha la pussaivladad a giuvenils da 16 fin 21 onns ed a classas dal stgalim secundar II da s’occupar a moda creativa cun las linguas naziunalas e cun las regiuns svizras. Ils texts inoltrads cumpletteschan la charta svizra interactiva da Linguissimo e s’uneschan ad in’ovra cuminaivla da giuvenils oriunds da tut las regiuns linguisticas. Il resultat è in guid da viadi svizzer unic che envida tut las persunas interessadas a far scuvridas, e quai sur ils cunfins linguistics ora.
Ina giuria tscherna e premiescha las meglras contribuziuns:
- la participaziun al final da dus dis a Bellinzona en ils locals da la biblioteca chantunala
- in viadi en ina metropola europeica per ils victurs dal final
- tranter tut las classas che participeschan tirain nus la sort per CHF 500.– per la cassa da classa
La concurrenza las Linguissimo vegn organisada dapi il 2008 dal Forum Helveticum, l’organisaziun per la chapientscha linguistica e culturala en Svizra, e da ses partenaris. Las infurmaziuns en connex cun la participaziun sco er indicaziuns didacticas per las persunas d’instrucziun chatt’ins en las quatter linguas naziunalas sin la pagina-web www.linguissimo.ch.
Infurmaziuns a las medias:
Quinta Schneiter, manadra da project, Forum Helveticum, info@linguissimo.ch
ubain t 062 888 01 25.
Link medias: http://linguissimo.ch/ch/medias-2/
Cun sustegn da:
Commentaris