23. Oktober 2019
Dschungla e teater sin il program da Linguissimo 2019/2020
La concurrenza da las linguas Linguissimo envida ils giuvenils da 16 fin 21 onns e las classas dal stgalim secundar II da sa barattar sur ils cunfins linguistics, e quai cun scriver. Per questa dudeschavla ediziun da la concurrenza concepeschan las participantas ed ils participants cun contribuziuns plurilinguas scrittas e multimedialas ina Svizra che sa referescha al chavazzin «dschungla». Las meglras contribuziuns gudognan:
- la participaziun al final da dus dis a Bellinzona
- in viadi en ina metropola europeica per ils victurs dal final
- tranter tut las classas che participeschan tirain nus la sort per CHF 500.– per la cassa da classa
Las participantas ed ils participants èn envidads d’inoltrar texts e maletgs en connex cun lieus svizzers ch’èn impurtants per els e che tematiseschan il chavazzin «dschungla». Cun lur contribuziuns cumpleteschan els la carta interactiva da la concurrenza (www.linguissimo.ch). Els pon sa laschar inspirar dals guauds da la Svizra, da la dschungla da la citad u d’autras dschunglas ch’ins po scuntrar en Svizra. Las participantas ed ils participants inoltreschan sin la pagina-web da la concurrenza lur contribuziuns e cumpletteschan quellas cun in curt text davart in’experientscha persunala plurilingua. Las contribuziuns scrittas vegnan redigidas en duas linguas naziunalas.
Las auturas ed ils auturs da las 30 contribuziuns las pli originalas vegnan envidads al final a Bellinzona. La fin d’emna da final è deditgada al teater e porscha workshops cun expertas ed experts da las quatter regiuns linguisticas. Il final metta en il center l’inscunter ed il barat linguistic: las participantas ed ils participants scrivan ensemen cun ina giuvna u in giuven d’ina autra regiun linguistica ina scena da teater. Ils trais megliers tandems bilings gudognan in viadi communabel en ina metropola europeica.
La concurrenza Linguissimo vegn organisada dapi il 2008 dal Forum Helveticum, l’organisaziun per la chapientscha linguistica e culturala en Svizra, e da ses partenaris. L’ultim termin d’annunzia è ils 31 da schaner 2020.
Las infurmaziuns en connex cun la participaziun sco era Indicaziuns didacticas per las persunas d’instrucziun chatt’ins en las quatter linguas naziunalas sin la pagina-web www.linguissimo.ch.
Communicaziun a las medias in PDF
Infurmaziuns a las medias:
Christine Matthey, directura Forum Helveticum, info@linguissimo.ch ubain t 062 888 01 25.
Link medias: http://linguissimo.ch/ch/medias-2/
Cun sustegn da:
Commentaris