22. Oktober 2018
L’ediziun 2018/2019 da Linguissimo è lantschada!
Per l’indeschavla giada en seria envida la concurrenza da las linguas Linguissimo ils giuvenils da 16 fin 21 onns e las classas dal stgalim secundar II da sa barattar sur ils cunfins linguistics, e quai cun scriver. Cun contribuziuns plurilinguas e multimedialas creeschan las participantas ed ils participants in guid per la Svizra da giuvenils per giuvenils. La meglras contribuziuns vegnan remuneradas:
- la participaziun al final da dus dis a Cuira tar la Lia Rumantscha
- in viadi en ina metropola europeica per ils victurs dal final
- tranter tut las classas che participeschan tirain nus la sort per CHF 500.– per la cassa da classa
Grazia a la charta interactiva da la Svizra sin la pagina-web www.linguissimo.ch pon las participantas ed ils participants parter texts e maletgs (fotos, videos, etc.) davart lieus svizzers ch’èn impurtants per els. Tut è permess: ficziun, descripziun, poesia, rap, scenas da teater… Las participantas ed ils participants inoltreschan sin la pagina-web da la concurrenza lur contribuziuns e cumpletteschan quellas cun in curt text persunal davart in’experientscha persunala plurilingua. Las contribuziuns scrittas vegnan redigidas en duas linguas naziunalas.
Las auturas ed ils auturs da las 30 contribuziuns las pli originalas vegnan envidads al final, nua ch’ils giuvenils inscuntran poetessas e poets ch’als introduceschan en lur tecnicas da scriver. Il final metta en il center l’inscunter ed il barat linguistic: las participantas ed ils participants scrivan ensemen cun ina giuvna u in giuven d’ina autra regiun linguistica ina poesia. Ils trais megliers tandems bilings gudognan in viadi communabel en ina metropola europeica.
La concurrenza Linguissimo vegn organisada dapi il 2008 dal Forum Helveticum, l’organisaziun per la chapientscha linguistica e culturala en Svizra, e da ses partenaris. L’ultim termin d’annunzia è ils 31 da schaner 2019.
Las infurmaziuns en connex cun la participaziun sco era Indicaziuns didacticas per las persunas d’instrucziun chatt’ins en las quatter linguas naziunalas sin la pagina-web www.linguissimo.ch.
Infurmaziuns a las medias:
Christine Matthey, directura Forum Helveticum, info@linguissimo.ch ubain t 062 888 01 25.
Link medias: http://linguissimo.ch/ch/medias-2/
Cun sustegn da:
Commentaris