23. Oktober 2017
Linguissimo 2017/2018 intimescha ils giuvenils da dissegnar da nov la Svizra
Per sia dieschavla ediziun survegn la concurrenza svizra da linguas Linguissimo in nov vestgì. Ina nova cumparsa visuala, in nov concept: Giuvenils da 16 fin 21 onns e las classas da la scola secundara II èn dumandads da crear cun contribuziuns scrittas e multimedialas in guid per la Svizra da giuvenils per giuvenils. Sin ina charta interactiva da la Svizra pon las participantas ed ils participants far enconuschent lur lieus preferids e tgirar il barat sur il cunfin linguistic ora. Las meglras contribuziuns vegnan remuneradas:
- la participaziun al final da dus dis a Friburg
- in viadi en ina metropola europeica per ils victurs dal final
- tranter tut las classas che participeschan tirain nus la sort per CHF 500.– per la cassa da classa
Grazia a la nova charta interactiva da la Svizra sin la pagina-web www.linguissimo.ch pon las participantas ed ils participants parter texts e maletgs (fotos, videos, etc.) davart lieus svizzers ch’èn impurtants per els. Tut è lubì: ficziun, descripziun, poesia, rap, scenas da teater … Las participantas ed ils participants ston mo colliar lur contribuziun via geolocalisaziun cun il lieu correspundent sin la pagina-web da la concurrenza e cumplettar ella cun in curt autopurtret en in’autra lingua naziunala.
Las auturas ed ils auturs da las 30 contribuziuns las pli originalas vegnan envidadas al final, nua ch’els emprendan d’enconuscher auturas ed auturs professiunals che mussan ad els co ch’ins scriva texts da chanzuns. Il final metta il focus sin l’inscunter ed il barat linguistic: las participantas ed ils participants scrivan ensemen cun ina giuvna u in giuven d’ina autra regiun linguistica in text. Ils trais megliers tandems bilings gudognan in viadi communabel en ina metropola europeica.
La pagina interactiva sa drizza er a giuvenils e persunas main giuvnas che vulan scuvrir la Svizra dasper las sendas ordinarias, lieus unics descrits a moda atipica da la giuventetgna svizra.
La concurrenza Linguissimo vegn organisada dapi il 2008 dal Forum Helveticum, l’organisaziun per la chapientscha linguistica e culturala en Svizra, e da ses partenaris. L’ultim termin d’annunzia è ils 31 da schaner 2018. Las infurmaziuns en connex cun la participaziun sco era tips per scolastas e scolasts chatt’ins en las quatter linguas naziunalas sin la pagina-web www.linguissimo.ch.
Infurmaziuns a las medias:
Christine Matthey, directura Forum Helveticum, info@linguissimo.ch ubain t 062 888 01 25.
Cun sustegn da:
Commentaris