Il Forum Helveticum, fundà il 1968 sco lieu d’inscunter e da dialog, s’engascha per la chapientscha linguistica e culturala tranter las differentas regiuns da la Svizra. Il forum è activ en ils secturs societad, politica, economia e cultura e surpiglia incumbensas d’infurmaziun, da cussegliaziun, da sensibilisaziun e da networking.
6. Mai 2025
Nov presidi per il Forum Helveticum
Ils 8 d’avrigl 2025 ha l’anteriura chanceliera federala Corina Casanova dà giu suenter nov onns il presidi dal Forum Helveticum. Durant quai temp è ella s’engaschada fermamain per il svilup da l’uniun. Hans Martin Tschudi prenda medemamain cumià. Sco vicepresident ha el influenzà durant 18 onns marcantamain il svilup strategic dal Forum Helveticum. Sco nov president è vegnì elegì Christian Levrat.
6. Mai 2025
Gruppa parlamentara «Plurilinguitad CH»
Commembers
La gruppa parlamentara «plurilinguitad CH» dumbra 47 commembers da tut las direcziuns politicas e regiuns linguisticas. La glista dals commembers è disponibla online (per tudestg).
Finamira
La plurilinguitad svizra è ina dimensiun constituenta impurtanta dal stadi helvetic. Quest element prezius da la «naziun fundada sin la voluntad» metta las quatter linguas naziunalas en ina relaziun d’egualitad e segirescha uschia la coesiun da las differentas regiuns linguisticas entaifer la Confederaziun. Igl è damai necessari da tgirar questa caracteristica naziunala per mantegnair l’equiliber helvetic.
29. April 2025
Instrucziun tempriva da linguas estras
En collavuraziun cun il Forum da la bilinguitad, Helvetia Latina e Conscienza Svizzera, ha il Forum Helveticum sutamess ina posiziun cuminaivla al cussegl federal, a las regenzas chantunalas, ad instituziuns da furmaziun ed a las medias naziunalas.
Quest document (ch’ins po telechargiar per tudestg e per franzos) pretenda che l’instrucziun d’ina segunda lingua naziunala vegnia mantegnida en tut ils chantuns svizzers a partir dal stgalim primar. Sin fundament da iniziativas currentas en intgins chantuns germanofons che mettan en dumonda l’instrucziun da franzos en scola primara, regordan nossas quatter organisaziuns a l’impurtanza da la plurilinguitad per la coesiun naziunala, per l’equiliber linguistic e per il bainstar economic en Svizra.
29. April 2025
Omagi a Roy Oppenheim: l’ierta è chapientscha
Roy Oppenheim, publicist da cultura e manager da radio e televisiun, è mort ils 8 d’avrigl 2025 en ses 85avel onn da vita. Dal 2002 fin il 2016 ha el presidià il Forum Helveticum ed è s’engaschà fermamain per il dialog tranter las cuminanzas linguisticas.
26. Februar 2025
Info PluriCH n°40
Il fegl d’infurmaziun «Info PluriCH» dat ina survista da las actualitads en connex cun la plurilinguitad en Svizra. Quest document è vegnì creà aposta per las parlamentarias ed ils parlamentaris da l’Assamblea federala plenara.
Ediziun actuala: Info PluriCH n°40 – primavaira 2025
3. Dezember 2024
L’emprima dieta annuala dal Forum Helveticum
Grazia al sustegn da l’Uffizi federal da cultura (UFC) ha il Forum Helveticum organisà ils 14 da november 2024 sia emprima dieta annuala davart il tema «utensils linguistics digitals en il mintgadi da lavur d’interpresas plurilinguas».