Temas
10. Juli 2025
Posiziun per mantegnair il sustegn svizzer da TV5 MONDE
Il Forum Helveticum ha suttascrit ina posiziun communabla cun la gruppa da reflexiun Coscienza Svizzera, cun il Forum du bilinguisme, la Helvetia Latina, la Lia Rumantscha e la Pro Grigioni Italiano. En quella pretendan las organisaziuns menziunadas – che s’engaschan tuttas per la promoziun da la plurilinguitad, per il dialog intercultural e la coesiun naziunala – d’obtegnair sustegn finanzial da la Confederaziun per l’emettur internaziunal francofon TV5 MONDE.
Las organisaziuns fan appel al Cussegl federal ed al Parlament federal da mantegnair il sustegn finanzial e politic da la Svizra per TV5 MONDE, da rinforzar la coordinaziun naziunala areguard las dumondas da la francofonia, da la plurilinguitad e da la diplomazia culturala sco er d’appreziar dapli la contribuziun da la Svizra per TV5 MONDE en la publicitad – spezialmain en vista a sia impurtanza per la visibilitad culturala, linguistica e politica da noss pajais.
L’entira posiziun è disponibla qua.
24. Juni 2025
Linguissimo a Delémont: in final plain poesia
Ils 14 e 15 da zercladur 2025 èn 27 giuvens talents da scriver da tut las parts da la Svizra sa scuntrads a Delémont al grond final da la concurrenza naziunala da scriver Linguissimo. En teams maschadads han els scrit poesias en duas u pliras linguas e preschentà quellas ad ina giuria ed al public. Ina giuria d’expert:as da tut las quatter regiuns linguisticas ha tschernì las trais pli creativas ed inspirantas contribuziuns. Las set victuras derivan dals chantuns BE, FR, GR, TI e VD.
Ils texts da finalistas e finalists èn da chattar sülla pagina d’internet da Linguissimo.
29. Mai 2025
Info PluriCH n°41
Il fegl d’infurmaziun «Info PluriCH» dat ina survista da las actualitads en connex cun la plurilinguitad en Svizra. Quest document è vegnì creà aposta per las parlamentarias ed ils parlamentaris da l’Assamblea federala plenara.
Ediziun actuala: Info PluriCH n°41 – stad 2025
6. Mai 2025
Nov presidi per il Forum Helveticum
Ils 8 d’avrigl 2025 ha l’anteriura chanceliera federala Corina Casanova dà giu suenter nov onns il presidi dal Forum Helveticum. Durant quai temp è ella s’engaschada fermamain per il svilup da l’uniun. Hans Martin Tschudi prenda medemamain cumià. Sco vicepresident ha el influenzà durant 18 onns marcantamain il svilup strategic dal Forum Helveticum. Sco nov president è vegnì elegì Christian Levrat.
6. Mai 2025
Gruppa parlamentara «Plurilinguitad CH»
Commembers
La gruppa parlamentara «plurilinguitad CH» dumbra 47 commembers da tut las direcziuns politicas e regiuns linguisticas. La glista dals commembers è disponibla online (per tudestg).
Finamira
La plurilinguitad svizra è ina dimensiun constituenta impurtanta dal stadi helvetic. Quest element prezius da la «naziun fundada sin la voluntad» metta las quatter linguas naziunalas en ina relaziun d’egualitad e segirescha uschia la coesiun da las differentas regiuns linguisticas entaifer la Confederaziun. Igl è damai necessari da tgirar questa caracteristica naziunala per mantegnair l’equiliber helvetic.
29. April 2025
Instrucziun tempriva da linguas estras
En collavuraziun cun il Forum da la bilinguitad, Helvetia Latina e Conscienza Svizzera, ha il Forum Helveticum sutamess ina posiziun cuminaivla al cussegl federal, a las regenzas chantunalas, ad instituziuns da furmaziun ed a las medias naziunalas.
Quest document (ch’ins po telechargiar per tudestg e per franzos) pretenda che l’instrucziun d’ina segunda lingua naziunala vegnia mantegnida en tut ils chantuns svizzers a partir dal stgalim primar. Sin fundament da iniziativas currentas en intgins chantuns germanofons che mettan en dumonda l’instrucziun da franzos en scola primara, regordan nossas quatter organisaziuns a l’impurtanza da la plurilinguitad per la coesiun naziunala, per l’equiliber linguistic e per il bainstar economic en Svizra.