Temas
17. Dezember 2025
Conferenza 2025: «A tgi tutga il service public? Mandat da medias e plurilinguitad tranter stadi, martgà e public
Ils 6 da november 2025 ha gì lieu en il Raiffeisen Forum a Berna la segunda conferenza annuala dal Forum Helveticum. L’occurrenza è sa deditgada ad in tema central per la coesiun sociala da la Svizra plurilingua: la rolla dal service public e da las medias tranter l’incumbensa dal stadi, las realitads economicas ed ils basegns dal public.
Suenter il bainvegni da la manadra da fatschenta Mélanie Girardet ha il president Christian Levrat avert la dieta cun suttastritgar l’impurtanza d’in service public ferm, independent e pluriling per la chapientscha tranter las regiuns linguisticas ed consequentamein per la coesiun interna dal pajais. Spezialmain en temps da midadas medialas, d’ina fragmentaziun digitala e d’ina pressiun economica creschenta dovri cleras respostas per las dumondas: co po l’incumbensa publica vegnir ademplida en il futur ed a tgi tutga il service public la finala?
La dieta ha reunì trais expertas cumprovadas da la pratica da medias e da la perscrutaziun:
- Nathalie Wappler Hagen, directura da SRF
• Ariane Dayer, schurnalista ed anteriura schefredactura da Le Matin Dimanche
• Prof. Dr. Alice Delorme Benites, manadra da l’Institut per la communicaziun plurilingua da la ZHAW
En lur trais referats d’input han las referentas mussà differentas perspectivas davart il service public medial.
Nathalie Wappler ha mussà, co SRF interpretescha oz l’incumbensa publica e co il service public medial sto vegnir sviluppà vinavant en ina societad digitalisada e multifara.
Ariane Dayer ha mess il focus sin la cuntrada mediala da la Svizra franzosa, sin sias sfidas economicas e structuralas e sin las consequenzas per la publicitad plurilingua.
Alice Delorme Benites ha preschentà resultats da perscrutaziun davart la plurilinguitad e davart la dumonda, co la communicaziun digitala po vegnir duvrada per render pli visibla e pli accessibla la diversitad linguistica.
Suenter ha Astrid Tomczak-Plewka moderà ina maisa radunda engaschada, nua che trais persunalitads han approfundi dumondas centralas: Co po il service public restar relevant? Co pon ins rinforzar la chapientscha tranter las regiuns linguisticas? Tge rolla giogan las medias privatas e publicas per la qualitad dal discurs democratic? E co èsi pussaivel d’integrar pli ferm il public?
Il Forum Helveticum ha ultra da quai envidà las participantas ed ils participants d’inoltrar anonimamain atgnas dumondas. Numerusas da quellas èn vegnidas tematisadas en la discussiun, quai che mussa il viv interess per in tema che va lunsch sur il sectur da las medias ora.
Cun la conferenza ha il Forum Helveticum mess in segn per il dialog tranter las cuminanzas linguisticas, las instituziuns e la publicitad. En il center dall’iniziativa stat numnadamain la persvasiun ch’il service public saja in bain communabel che vegn furmà da nus tuts e che è decisivs per la diversitad, la chapientscha e la coesiun da la Svizra.
Conferenza annuala dal Forum Helveticum; directura Mélanie Girardet (fotografia: Manuel Lopez)
Conferenza annuala dal Forum Helveticum; president Christian Levrat (fotografia: Manuel Lopez)
Prof. Dr. Alice Delorme Benites, directura da l’Institut per communicaziun plurilingua da la ZHAW; Nathalie Wappler Hagen, directura da SRF; Astrid Tomczak-Plewka, moderatura; Ariane Dayer, schurnalista ed anteriura redactura chantunala da Le Matin Dimanche.
26. November 2025
Info PluriCH n°43
Il fegl d’infurmaziun «Info PluriCH» dat ina survista da las actualitads en connex cun la plurilinguitad en Svizra. Quest document è vegnì creà aposta per las parlamentarias ed ils parlamentaris da l’Assamblea federala plenara.
Ediziun actuala: Info PluriCH n°43 – enviern 2025
19. November 2025
Gruppa parlamentara «Plurilinguitad CH»
Commembers
La gruppa parlamentara «plurilinguitad CH» dumbra 48 commembers da tut las direcziuns politicas e regiuns linguisticas. La glista dals commembers è disponibla online (per tudestg).
Finamira
La plurilinguitad svizra è ina dimensiun constituenta impurtanta dal stadi helvetic. Quest element prezius da la «naziun fundada sin la voluntad» metta las quatter linguas naziunalas en ina relaziun d’egualitad e segirescha uschia la coesiun da las differentas regiuns linguisticas entaifer la Confederaziun. Igl è damai necessari da tgirar questa caracteristica naziunala per mantegnair l’equiliber helvetic.
15. Oktober 2025
La nova ediziun 2026 da LINGUISSIMO è lantschada!
La pli nova ediziun da la concurrenza da scriver Linguissimo è lantschada! Gia per la 18avla giada envidain nus giuvenils tranter 16 e 21 onns da participar a la concurrenza plurilingua. Il motto da quest onn sa cloma «Chattar ina via».
15. Oktober 2025
Di dal plurilinguissem 2025: In ferm signal dal parlament
Da sanestra a dretga: las cusseglieras naziunalas Greta Gysin e Anna Giacometti, co-presidentas da la gruppa parlamentara «ITALIANITÀ»; cusseglier naziunal Laurent Wehrli, president da Helvetia Latina; cusseglier naziunal Martin Candinas, president da las gruppas parlamentaras «Plurilinguitad CH» e «Lingua e cultura rumantscha» (Fotografia: Monika Flückiger / Forum Helveticum)
L’instituziun Helvetia Latina sco era las gruppas parlamentaras «Plurilinguitad CH» (il secretariat vegn manà dal Forum Helveticum), «ITALIANITÀ» e «Lingua e cultura rumantscha» han envidà a la settavla ediziun. La conferenza da pressa ha offert in’occasiun preziusa per reflectar las sfidas actualas da la politica linguistica svizra. L’aperitiv tradiziunal a caschun dal Di dal plurilinguissem è sa mussà danovamain sco lieu viv per barats tranter las parlamentarias ed ils parlamentaris sco er tranter las represchentantas ed ils represchentants che s’engaschan per las linguas naziunalas e per la plurilinguitad.
9. September 2025
Info PluriCH n°42
Il fegl d’infurmaziun «Info PluriCH» dat ina survista da las actualitads en connex cun la plurilinguitad en Svizra. Quest document è vegnì creà aposta per las parlamentarias ed ils parlamentaris da l’Assamblea federala plenara.
Ediziun actuala: Info PluriCH n°42 – atun 2025