6. Mai 2025
Nov presidi per il Forum Helveticum
Ils 8 d’avrigl 2025 ha l’anteriura chanceliera federala Corina Casanova dà giu suenter nov onns il presidi dal Forum Helveticum. Durant quai temp è ella s’engaschada fermamain per il svilup da l’uniun. Hans Martin Tschudi prenda medemamain cumià. Sco vicepresident ha el influenzà durant 18 onns marcantamain il svilup strategic dal Forum Helveticum. Sco nov president è vegnì elegì Christian Levrat.
Sut il presidi da Corina Casanova è il Forum Helveticum sa sviluppà vinavant ad in center da cumpetenza per la chapientscha linguistica e culturala. Cun projects sco la concurrenza da scriver per giuvenils Linguissimo, l’exposiziun ambulanta Helvetismen ed il Di dal plurilinguissem en la Chasa federala ha ella dà ferms impuls per in dialog intercultural.
Hans Martin Tschudi ha fatg part dapi l’onn 2007 dal comité directiv ed ha gidà a furmar la midada instituziunala. El ha contribuì a la modernisaziun dals statuts e ha posiziunà il Forum Helveticum sco plattafurma d’impurtanza naziunala per dumondas da coesiun linguistica e culturala.
La radunanza da delegads ha elegì Christian Levrat, ch’è dapi 2022 commember da la suprastanza, sco nov president dal Forum Helveticum. L’anteriur cusseglier naziunal, cussegl dals chantuns e president da la Partida socialdemocratica da la Svizra (PPS) è actualmain president dal cussegl d’administraziun da la Posta Svizra sco er president da l’UNICEF Svizra e dal Principadi da Liechtenstein.
Christian Levrat dispona d’ina gronda rait da contacts, enconuschientschas profundas da la politica linguistica sco er in engaschi politic da plirs onns sin nivel naziunal. El è tranter auter stà l’iniziant da l’iniziativa parlamentara Levrat per rinforzar la diversitad linguistica sin plaun federal. Cun sia elecziun sco president po il Forum Helveticum profitar da sias experientschas preziusas en il sectur da la coesiun naziunala e da la chapientscha culturala.
Commentaris