29. April 2025
Omagi a Roy Oppenheim: l’ierta è chapientscha
Roy Oppenheim, publicist da cultura e manager da radio e televisiun, è mort ils 8 d’avrigl 2025 en ses 85avel onn da vita. Dal 2002 fin il 2016 ha el presidià il Forum Helveticum ed è s’engaschà fermamain per il dialog tranter las cuminanzas linguisticas.
En in temp che la coesiun linguistica culturala da la Svizra è vegnida messa a la prova pli che mai, è Roy Oppenheim s’engaschà cun forza per il dialog tranter las regiuns linguisticas. Sut ses presidi è il Forum Helveticum sa sviluppà ad ina plattafurma viva per il barat tranter societad, politica, economia e cultura.
Roy Oppenheim ha chapì da cumbinar l’incumbensa originala dal Forum Helveticum – da far punts tranter las cuminanzas linguisticas da la Svizra – cun las sfidas d’in mund pli e pli globalisà e digitalisà. Cun in’impressiunanta clerezza intellectuala, ina profunda chapientscha per la plurilinguitad svizra ed in fin sentiment per process politics, ha el manà il Forum Helveticum en ina nov’etappa da svilup.
Roy Oppenheim lascha enavos fastizs persistents. Els ans fan endament che chapientscha e diversitad na sa chapeschan betg da sasez, mabain pretendan in engaschi activ. Il Forum Helveticum vegn a purtar vinavant questa ierta en renconuschientscha e responsabladad.
Fotografia: Felix Schenker
Commentaris