1. Februar 2018
Per ina cuntrada audiovisuala multifara ed independenta en Svizra
Il Forum Helveticum, il forum per la chapientscha linguistica e culturala, cumbatta vehementamain l’iniziativa No Billag, davart la quala i vegn votà ils 4 da mars, e recumonda da refusar ella. L’iniziativa periclitescha la plurilinguitad, la coesiun, la solidaritad naziunala sco era nossa democrazia directa.
Il sistem da taxas actual permetta cuntegns medials multifars, relevants per la Svizra e d’auta qualitad. La SRG SSR ed ils emetturs privats subvenziunads garanteschan a tut ils abitants da la Svizra, independentamain da lur lingua e da lur lieu da domicil (regiun linguistica, center urban u periferia), l’access ad ina purschida equivalenta en il senn dal service public. Che tuts pajan la medema taxa correspunda al princip da solidaritad, sin il qual noss federalissem sa basa. L’aboliziun da questa taxa periclitescha la varietad, la coesiun naziunala e l’egualitad da las burgaisas e dals burgais da noss pajais.
Oz impegna la Constituziun federal interpresas da radio e televisiun a qualitad, imparzialitad e represchentaziun dals interess regiunals. Cun l’iniziativa No Billag vegn quest impegn abolì. Tut quests elements fissan en l’avegnir surlaschads a la bainvulientscha da purschiders privats ch’èn exposts al squitsch dal martgà e/u al squitsch da concerns da l’exteriur. No Billag avess per consequenza directa la fin da la SSR. La Svizra n’avess nagin purschider naziunal pli che fiss capabel da furnir las infurmaziuns necessarias ed ils cuntegns medials per ina democrazia directa intacta en in stadi federalistic cun trais minoritads linguisticas. Il Forum Helveticum considerescha perquai l’iniziativa No Billag sco privel per la Svizra, per sia varietad culturala e linguistica, per sia coesiun naziunala e per sia democrazia, independenza e suveranitad. Il Forum Helveticum recumonda da refusar l’iniziativa dal pievel No Billag.
Corina Casanova, Presidenta, & Christine Matthey, Directura
Forum Helveticum
Infurmaziuns a las medias:
Christine Matthey, directura Forum Helveticum, info@forum-helveticum.ch ubain t 062 888 01 25.
Commentaris