Il Forum Helveticum, fundà il 1968 sco lieu d’inscunter e da dialog, s’engascha per la chapientscha linguistica e culturala tranter las differentas regiuns da la Svizra. Il forum è activ en ils secturs societad, politica, economia e cultura e surpiglia incumbensas d’infurmaziun, da cussegliaziun, da sensibilisaziun e da networking.
15. Oktober 2025
La nova ediziun 2026 da LINGUISSIMO è lantschada!
La pli nova ediziun da la concurrenza da scriver Linguissimo è lantschada! Gia per la 18avla giada envidain nus giuvenils tranter 16 e 21 onns da participar a la concurrenza plurilingua. Il motto da quest onn sa cloma «Chattar ina via».
15. Oktober 2025
Di dal plurilinguissem 2025: In ferm signal dal parlament
Da sanestra a dretga: las cusseglieras naziunalas Greta Gysin e Anna Giacometti, co-presidentas da la gruppa parlamentara «ITALIANITÀ»; cusseglier naziunal Laurent Wehrli, president da Helvetia Latina; cusseglier naziunal Martin Candinas, president da las gruppas parlamentaras «Plurilinguitad CH» e «Lingua e cultura rumantscha» (Fotografia: Monika Flückiger / Forum Helveticum)
L’instituziun Helvetia Latina sco era las gruppas parlamentaras «Plurilinguitad CH» (il secretariat vegn manà dal Forum Helveticum), «ITALIANITÀ» e «Lingua e cultura rumantscha» han envidà a la settavla ediziun. La conferenza da pressa ha offert in’occasiun preziusa per reflectar las sfidas actualas da la politica linguistica svizra. L’aperitiv tradiziunal a caschun dal Di dal plurilinguissem è sa mussà danovamain sco lieu viv per barats tranter las parlamentarias ed ils parlamentaris sco er tranter las represchentantas ed ils represchentants che s’engaschan per las linguas naziunalas e per la plurilinguitad.
9. September 2025
Info PluriCH n°42
Il fegl d’infurmaziun «Info PluriCH» dat ina survista da las actualitads en connex cun la plurilinguitad en Svizra. Quest document è vegnì creà aposta per las parlamentarias ed ils parlamentaris da l’Assamblea federala plenara.
Ediziun actuala: Info PluriCH n°42 – atun 2025
10. Juli 2025
Posiziun per mantegnair il sustegn svizzer da TV5 MONDE
Il Forum Helveticum ha suttascrit ina posiziun communabla cun la gruppa da reflexiun Coscienza Svizzera, cun il Forum du bilinguisme, la Helvetia Latina, la Lia Rumantscha e la Pro Grigioni Italiano. En quella pretendan las organisaziuns menziunadas – che s’engaschan tuttas per la promoziun da la plurilinguitad, per il dialog intercultural e la coesiun naziunala – d’obtegnair sustegn finanzial da la Confederaziun per l’emettur internaziunal francofon TV5 MONDE.
Las organisaziuns fan appel al Cussegl federal ed al Parlament federal da mantegnair il sustegn finanzial e politic da la Svizra per TV5 MONDE, da rinforzar la coordinaziun naziunala areguard las dumondas da la francofonia, da la plurilinguitad e da la diplomazia culturala sco er d’appreziar dapli la contribuziun da la Svizra per TV5 MONDE en la publicitad – spezialmain en vista a sia impurtanza per la visibilitad culturala, linguistica e politica da noss pajais.
L’entira posiziun è disponibla qua.
24. Juni 2025
Linguissimo a Delémont: in final plain poesia
Ils 14 e 15 da zercladur 2025 èn 27 giuvens talents da scriver da tut las parts da la Svizra sa scuntrads a Delémont al grond final da la concurrenza naziunala da scriver Linguissimo. En teams maschadads han els scrit poesias en duas u pliras linguas e preschentà quellas ad ina giuria ed al public. Ina giuria d’expert:as da tut las quatter regiuns linguisticas ha tschernì las trais pli creativas ed inspirantas contribuziuns. Las set victuras derivan dals chantuns BE, FR, GR, TI e VD.
Ils texts da finalistas e finalists èn da chattar sülla pagina d’internet da Linguissimo.
29. Mai 2025
Info PluriCH n°41
Il fegl d’infurmaziun «Info PluriCH» dat ina survista da las actualitads en connex cun la plurilinguitad en Svizra. Quest document è vegnì creà aposta per las parlamentarias ed ils parlamentaris da l’Assamblea federala plenara.
Ediziun actuala: Info PluriCH n°41 – stad 2025